Þjálfari LIU: Ég býst við miklu af Martin og Elvari

Martin Hermannsson og Elvar Már Friðriksson, landsliðsmenn í körfubolta, hefja leik í efstu deild háskólaboltans með LIU Brooklyn í nótt þegar liðið mætir St. Johns.

Jack Perri, þjálfari liðsins, fer fögrum orðum um Íslendingana tvo í viðtali á heimasíðu skólans, en þeim er ætlað stórt hlutverk í liðinu.

„Þeir eru svolítið öðruvísi því þeir eru búnir að spila atvinnumannakörfubolta á Íslandi. Því eru þeir kannski tilbúnari en hinir,“ segir Perri.

„Þetta eru yndislegir strákar sem lítið þarf að hafa fyrir og þeir leggja sig alla fram. Þeir hlusta á það sem þeim er sagt og eru báðir mjög hæfileikaríkir.“

Bæði Elvar og Martin, sem báðir eru fæddir 1994, fóru á kostum á síðustu leiktíð í Dominos-deildinni.

Elvar Már skoraði að meðaltali 20,8 stig í leik fyrir Njarðvík, tók 4,3 fráköst og gaf 7,3 stoðsendingar í 30 leikjum á meðan Martin leiddi KR til Íslandsmeistaratitils með 18,8 stigum að meðaltali í leik auk þess að gefa 4,5 stoðsendingar og taka 3,4 fráköst.

„Ég býst við miklu af þeim báðum við upphaf leiktíðar,“ segir Jack Perri, þjálfari LIU Brooklyn.