Lík fannst í Bleiksárgljúfri

Björgunarsveitarmenn Landsbjargar, sem fóru til leitar í og við Bleiksárgljúfur í Fljótshlíð í gærkvöldi, fundu lík af konu fremst í gljúfrinu. Talið er að líkið sé af Ástu Stefánsdóttur, sem leitað hefur verið á þessum slóðum síðan tíunda júní, en þann dag fannst lík sambýliskonu hennar, Pino De Los Angeles Becerra Bolanos, ofar í gljúfrinu.

Lögregla mun áfram vinna að rannsókn málsins, en í skeyti frá henni segir að lögregla og fjölskyldur kvennanna þakki björgunarsveitarmönnum og öðrum þeim, sem aðstoðað hafa við leit undanfarinn mánuð, óeigingjarnt starf sitt.