Jólalag Gillz reynist algjör sprengja

Óhætt er að segja að nýtt jólalag plötusnúðsins og líkamsræktarfrömuðarins Egils Einarssonar hafi slegið í gegn á Internetinu. Egill, sem er einnig þekktur sem Gillz og DJ Muscleboy gaf lagið MUSCLEBELLS út á föstudaginn. Agli reiknast til að lagið hafi verið spilað í eina og hálfa milljón skipta í gegnum YouTube og Facebook. Lagið vann hann í samstarfi við StopWaitGo og myndbandið var gert af Ice Cold Music Group.

Egill var hinn ánægðasti þegar Vísir heyrði í honum nú um hádegisbilið.

„Ég held að enginn Íslendingur hafi náð slíkum árangri. Enn eitt metið. Ég er orðin internet-sensation. En, það var nú bara tímaspursmál.“

Egill segist ekki vita á þessu stigi hvað vinsældir lagsins þýði eða hafi í för með sér og hvaða dyr þetta geti opnað en myndbandið er á miklu flugi um netheima. „Það er hægt að græða pening á Youtube-spilun, ef þetta heldur áfram á þessu flugi. En ég er ennþá að reyna að læra almennilega inná þetta. Ef ég á að vera alveg hreinskilinn, þá bjóst ég ekki alveg við þessari sprengju.

Hann segir stór nöfn í fitnes-heiminum þegar búin að tengja við myndbandið og vekja á því athygli, menn milljónir manna fylgjast með á Internetinu. Jeff Seid er einn þeirra en tvær milljónir manna lesa reglulega það sem hann hefur til málanna að leggja. „Annar er Jaco de Bruyn WBFF Pro. Hann er með 1,4 milljón „followers“ og þá má nefna Shaun Stafford og Matt Ogus. Antoine Vaillant er svo enn einn en hann hefur sent mér fyrirspurn og vill gera myndband sjálfur og nota lagið undir,“ segir Egill. Hann telur ljóst að hann sé búinn að leggja líkamsræktarbransann að fótum sér með laginu og myndbandinu. Spurningin sé einungis hvort myndbandið fari á enn meira flug.