Nýr héraðssaksóknari með fimmtíu menn að störfum

Gert er ráð fyrir að fimmtíu manns muni starfa hjá embætti héraðssaksóknara sem til stendur að stofna. Sigmundur Davíð Gunnlaugsson dómsmálaráðherra kynnti frumvarpið í ríkisstjórn í gær.

Frumvarpið var samið á vegum réttarfarsnefndar að frumkvæði dómsmálaráðherra, meðal annars á grundvelli minnisblaðs stýrihóps um mótun réttaröryggisáætlunar og vinnuhóps um framtíðarskipan ákæruvalds.

Samkvæmt frumvarpinu verður ákæruvald á tveimur stigum. Annars vegar ríkissaksóknari á efra ákærustigi og hins vegar níu lögreglustjóraembætti og héraðssaksóknari á lægra ákæruvaldsstigi.

Í minnisblaðinu segir að héraðssaksóknari muni fara með ákæruvald vegna flestra þeirra brota sem ríkissaksóknari fer nú með ákæruvald í fyrir héraðsdómi og fari jafnframt með rannsókn og saksókn alvarlegra skattalaga- og efnahagsbrota, brota gegn valdstjórninni og brota starfsmanna lögreglu.

Þá segir að ársverk við embætti sérstaks saksóknara hafi orðið flest 94 á árinu 2012 og litlu færri á árinu 2013. Reikna megi með að ársverk við embættið á árinu 2014 séu 68. Starfsmenn við embætti héraðssaksóknara verði talsvert færri, eða um 50, þrátt fyrir að verkefni þess verði aukin.

Í frumvarpinu er gert ráð fyrir að sú deild sem fengist við þau ákæruvaldsverkefni sem flutt yrðu frá ríkissaksóknara og vegna brota starfsmanna lögreglu og brota gegn valdstjórninni yrði nokkuð afmörkuð frá annarri starfsemi og að yfir þeirri deild yrði yfirsaksóknari. Yfir ákæruvaldsverkefnum á sviði skattalaga- og efnahagsbrota yrði saksóknari efnahagsbrota.

Auk forstöðumanns yrðu 6 ársverk við stoðþjónustu. Um 28 yrðu við verkefni sem embætti sérstaks saksóknara hefur sinnt en 15 við verkefni frá ríkissaksóknara, ríkislögreglustjóra og öðrum lögregluembættum svo og ný verkefni.

Í minnisblaðinu segir að að því gefnu að Alþingi ljúki löggjafarvinnunni fyrir næstu áramót ætti að vera raunhæft að lögin tækju gildi 1. janúar 2016 og embættið tæki þá til starfa. Ekki virðist þjóna neinum tilgangi að gera breytingar á starfsemi embættis sérstaks saksóknara fyrr en embætti héraðssaksóknara tæki við verkefnum þess, en þó ætti að vera unnt að fækka starfsmönnum sérstaks saksóknara verulega frá 1. janúar 2015 eða niður í 45-50.