Íslendingur kennir fólki að ná langt í Hollywood

„Þegar fólk kemur til Hollywood í leit að frama, fær það engar leiðbeiningar um hvernig best sé að koma sér á framfæri og vildum við því athuga hvernig nokkrar þekktar stjörnur gerðu það þegar þær komu hingað,“ segir Anna Zerin.

Hún, ásamt eiginmanni sínum, Dan Zerin, hefur umsjón með vefþætti sem kallast Entertainment Drive-Thru.

Í þættinum tala þau við þekktar stjörnur í Hollywood og fá að heyra hvernig þær tóku sín fyrstu skref í átt að frama.

„Við tölum við fólk úr öllum geirum skemmtanabransans og heyrum hvað virkar og hvað virkar ekki, hvaða skólar, síður og bækur hjálpa til og hvaða ráð þau hafa fyrir hlustendur okkar,“ útskýrir Anna.

Þau hjónin búa bæði í Los Angeles og kynntust þegar þau stunduðu nám við tónlistarskólann Musicians Institute í Hollywood. Þau starfa einnig saman í tónlist, í hljómsveitinni Anna and the bells.

„Hugmyndin kviknaði þegar við fórum að feta okkur áfram í Los Angeles og vildum við fá að heyra sögur fólks sem hefur náð langt.“

Þau hafa tekið viðtal við fólk á borð við Alan Ritchson, sem leikur í Hunger Games og Blue Mountain State, Kevin Farley, sem er grínisti og bróðir Chris Farley, Jennifer Batten, sem var gítarleikari Michaels Jackson, og David Myers sem er trommuleikari Franks Ocean.

„Við erum með mjög flotta viðmælendur og vorum nú síðast að klára að taka viðtal við Rhondu Smith, sem er bassaleikari Jeffs Beck og Prince, Tommy Emmanuel, sem er acoustic-gítarsnillingur, og Greg Howe, sem hefur spilað með Michael Jackson, Justin Timberlake og Enrique Iglesias.

Við tókum líka viðtöl við upprennandi tónlistarmenn, leikara og grínista. Við höfum talað við íslenskt tónlistarfólk í Los Angeles eins og Jökul Erni Jónsson og Steinunni Ósk Axelsdóttur,“ útskýrir Anna.

Jökull Ernir Jónsson hefur einnig aðstoðað hjónin við að klippa þættina.

Þá er á stefnuskránni að tala við Íslendinga í haust.

„Við munum spjalla við Steed Lord, Hebu sem er makeup-artisti fyrir Tarantino, Eddu Björgvins og marga fleiri.“

Hægt er að nálgast þættina og lesa sér til um gestina á vefsíðunni EntertainmentDrivethru.com.