Fölskvalaus ánægja um helgina

Útihátíðir verslunarmannahelgarinnar fóru vel fram að mati lögreglu. Ekkert kynferðisbrot hefur verið kært og ekki urðu alvarleg umferðarslys.

Ekki byrjaði helgin þó vel fyrir norðan því lögreglunni á Akureyri barst tilkynning um líkamsárás aðfaranótt föstudags en þá hafði árásarmaðurinn skellt fórnarlambinu niður og sparkað í það. En fall er faraheill og að þessu ódæði undanteknu bar ekkert alvarlegt mál á góma lögreglunnar á Akureyri, frekar en í Vestmannaeyjum þar sem um sextán þúsund manns voru samankomnir í Herjólfsdal. Fimm líkamsárásir voru kærðar í Eyjum en í engum þeirra var um alvarleg meiðsl að ræða.

Vissulega var nokkur erill hjá lögreglu og yfirvaldið í Eyjum gerði um 50 neysluskammta af fíkniefnum upptæka. Voru þetta kannabisefni, amfetamín, kókaín og e-töflur. Eins var erillinn nokkur aðfaranótt laugardags fyrir norðan.

Lögreglan á Ísafirði er í skýjunum með sína gesti. Þar var viðbúnaður mikill og fíkniefnahundurinn Tindur með nefið í hvers manns koppi en fann þó ekkert sem honum þótti bitastætt. Einn gisti fangageymslu yfir helgina á Ísafirði en sá var friðsæll og hafði bara tapað áttum.

Guðrún Jónsdóttir, talskona Stígamóta, segir of snemmt að fagna vel heppnaðri helgi. Í fyrra hafi tíu nauðganir átt sér stað á útihátíðum. Ekkert fórnarlambanna hafði þó leitað sér aðstoðar áður en verslunarmannahelgin var öll.