Ökklabrotnaði í gúmmítúttum í Eyjum: „Ég þurfti að hringja í 112 í brekkunni“

Elísabet Karen Magnúsdóttir vonast til þess að reynsla hennar verði til þess að aðrir fari ekki í gúmmítúttum á Þjóðhátíð í Eyjum. Elísabet var gestur á Þjóðhátíð, sem fór fram um helgina, en kom heim talsvert fyrr en hún átti að koma heim, því að hún rann til brekkunni í Herjólfsdal og ökklabrotnaði.

„Já, ég var að ganga þarna um á laugardagskvöldinu og það var auðvitað frekar hált þarna, því brekkan var blaut. Síðan rann ég svoleiðis og datt á hausinn. Þegar ég rann tókst mér að snúa einhvernveginn upp á ökklann og fann strax sársauka," rifjar Elísabet upp og heldur áfram:

„Ég gat bara ekki með nokkru móti staðið upp. Þannig að ég þurfti að ég þurfti að hringja í 112 í brekkunni."

Sjúkraflutningamenn komu og sóttu Elísabetu og fóru með hana í sjúkratjaldið sem var þarna skammt frá. „Þar var reynt að meta á mér fótinn og var grunur um að ég væri ökklabrotin. Ég þurfti að fara heim á sunnudeginum og þá kom í ljós að ég var ökklabrotin og með slitin liðbönd," útskýrir Elísabet. Hún þurfti að gangast undir aðgerð á sunnudeginum og liggur enn á Landspítalanum. „Ég þurfti að fá plötur í ökklann. Ég vonast til að komast heim sem fyrst, en það gæti verið að það verði ekki fyrr en á morgun. Þetta er auðvitað alveg hrikalegt. Ég verð frá í sex vikur," segir hún. Eins og sjá má á meðfylgjandi myndum er Elísabet með umbúðir langt upp fótlegginn

Þrátt fyrir áfallið segist Elísabet hafa skemmt sér rosalega vel á Þjóðhátíð. „Þetta var ógeðslega gaman. Ég sé alls ekki eftir ferðinni."

Hefur þú í hyggju að fara aftur á Þjóðhátíð?

„Já, algjörlega. Ég skelli mér bara strax á næsta ári," svarar hún með gleðitón í röddinni.

En Elísabet vonast samt til þess að aðrir læri af hennar reynslu. „Ég vil bara koma í veg fyrir að fólk verði í gúmmítúttum í brekkunni. Ef ég hefði verið í gönguskóm hefði ég líklega ekki runnið. Stuðningurinn við ökklann er náttúrulega enginn í gúmmítúttum. Eins ég segi; ég vona að fólk fari bara ekkert í gúmmitúttum í brekkuna."