Reykjavík framtíðarinnar

Ein besta vinkona mín, Heiða Björg Hilmisdóttir, ákvað á dögunum að bjóða sig fram til setu í borgarstjórn Reykjavíkur og taka þátt í komandi prófkjöri Samfylkingarinnar. Sem góð vinkona styð ég hana eindregið í þeirri baráttu ekki síst þar sem ég veit að hún mun sinna þeim verkefnum sem upp koma af sömu ákefð, áhuga og útsjónarsemi og hún hefur alltaf gert.

Reykjavíkurborg stendur frammi fyrir fjölmörgum áskorunum á næstu árum og má þar ekki síst nefna húsnæðis-, skipulags- og samgöngumál. Fleiri mál sem oft eru minna sýnileg en eru ekki síður mikilvæg eru Heiðu sérstök baráttumál. Meðal þeirra eru málefni skólanna, heilsa og vellíðan borgarbúa svo sem að sjá til þess að öldruðum, öryrkjum og fötluðum sé sýnd sú sjálfsagða kurteisi og virðing að fá að taka þátt í samfélagi borgarinnar á jafnréttisgrundvelli og á eigin forsendum.

Heiða hefur að mínu mati bæði nauðsynlega og nægjanlega þekkingu og reynslu til að sinna hagsmunum Reykjavíkur af þeirri alúð, áhuga og ástríðu sem ég tel að séu forsenda þess að borgarfulltrúum farnist vel í starfi. Reykjavík þarf á slíkum fulltrúum að halda og Heiða er ein af þeim.