Undrast yfirlýsingar Hornafjarðar

Ingvar Þ. Geirsson, eigandi Ice Lagoon, vísar á bug fullyrðingum um að fyrirtækið hafi ekki öll tilskilin leyfi fyrir starfsemi sína.

„Í ljósi fjölmiðlaumfjöllunar um leyfismál Ice Lagoon ehf. þá er því hér með komið á framfæri að fyrirtækið er með öll þau leyfi sem til þarf til að stunda útsýnissiglingar með ferðamenn um Jökulsárlón. Fyrirtækið er með samning við meirihluta landeigenda fyrir starfseminni,“ segir í yfirlýsingu frá Ingvari, þar sem vísað er í afrit af starfsleyfi frá Siglingastofnun og ferðaskipuleggjendaleyfi frá Ferðamálastofu.

Í Fréttablaðinu á mánudag kom fram að Einar Björn Einarsson, eigandi fyrirtækisins Jökulsárlón ehf. sem er samkeppnisaðili Ice Lagoon, hefði krafist þess að sveitarfélagið Hornafjörður stöðvaði starfsemi Ice Lagoon sökum leyfisleysis.

Björn Ingi Jónsson, bæjarstjóri Hornafjarðar, sendi Ingvari bréf þess efnis fyrir rúmri viku með tíu daga andmælafresti. Þar var Ingvar krafinn um stöðuleyfi, sem honum þykir undarlegt.

„Samkvæmt reglugerð má búnaður standa í allt að tvo mánuði án stöðuleyfa. Ég fór af stað með starfsemina mína 11. júní og er enn innan þess tímaramma. Mér finnst ótrúlegt að bæjarstjóri sveitarfélags skuli fara fram með þessum hætti þegar tilskilinn frestur er ekki runninn út til að andmæla bréfinu. Það góða orðspor sem fyrirtækið hefur byggt upp síðastliðinn fjögur ár er rifið þarna niður,“ segir hann.