Taktu landnámshænu í fóstur

Júlíus Már Baldursson, ræktandi í Þykkvabæ, býður fólki sem langar til að eiga íslenska landnámshænu, en hefur ekki tök á að hafa hænuna hjá sér, að taka hænur í fóstur.

Með því að taka hænu í fóstur borgar viðkomandi fyrir hænuna sjálfa og fóðrið hennar í tvö ár, en Júlíus hugsar um hana, elur hana upp og sendir eigandanum egg úr henni ellefu mánuði ársins, en í einn mánuð á ári fellur varp niður þegar hún fellir fjaðrir.

Um er að ræða um það bil tuttugu egg, mánaðarlega.

Eigandinn gefur hænunni sinni nafn, hún er merkt honum og heldur sínu nafni alla tíð.

Það má koma allt að þrisvar á ári til að skoða hænuna, en einnig er hægt að komast að samkomulagi um heimsóknir eftir því hvernig það hentar eigandanum.

Þegar fólk tekur hænu í fóstur er því frjálst að halda á henni, verja tíma með henni, skoða hvernig hún býr og þar fram eftir götunum.

Fólk velur sér unga hænu, annaðhvort á staðnum eða eftir myndum sem Júlíus sendir, og fær fréttir af henni á þriggja mánaða fresti. Þá fær fólk jólakort frá landnámshænunni sinni.

Sunna Ben, myndlistarmaður og plötusnúður, er ein þeirra sem hafa landnámshænu í fóstri.

„Þetta er algjör snilld! Mín hæna heitir Tína. Ef þið eruð ekki búin að taka landnámshænu í fóstur mæli ég með að fara í málið hið snarasta. Þetta er nefnilega auðveldasta og ódýrasta leiðin fyrir okkur borgarbúana til að eignast lífræn „free range“ egg frá hressum hænum, svo ekki sé minnst á að það að fóstra landnámshænu hjálpar til við að halda stofninum uppi,“ segir Sunna og hvetur borgarbúa og aðra til að taka hænu í fóstur.

Hvað kostar að taka hænu í fóstur?



25.000 krónur fyrir tvö ár

Hænan kostar 5.000 krónur 20 vikna gömul, en Júlíus hefur þá alið hana upp í þann tíma. Hænan hefur varp um þann aldur.

Landnámshænan þarf um 120 grömm af fóðri á dag sem gera um 44 kíló á ári.

Kílóið kostar 128 krónur sem gerir þá 5.633 krónur á ári, samtals 11.266.

4.734 krónurnar sem eftir standa notar Júlíus sem tryggingu ef fóður skyldi hækka á samningstímanum, vegna lyfjakaupa og fleira er til fellur.