Börnin á puttanum með pabba

„Við skrifuðum söguna saman en vorum þó á sitthvorum staðnum á hnettinum,“ segir Kolbrún Anna Björnsdóttir, rithöfundur og leikkona, en hún skrifar bókina, Á puttanum með pabba, ásamt Völu Þórsdóttur rithöfundi og leikkonu en Vala býr á Möltu. „Við unnum saman í gegnum Skype og það gekk alveg ótrúlega vel, það var bara eins og við værum í sama herberginu,“ bætir Kolbrún Anna við.

Sagan gerist í sumarfríi íslensk-ítölsku systkinanna Sonju og Frikka á Sikiley en þau eyða sumrinu með pabba, afa og ömmu. Fríið byrjar ekki vel því amma og afi verða snögglega að sinna veikum frænda og pabba er boðið draumahlutverk í kvikmynd á Spáni. Allt í einu er enginn til staðar á Sikiley til að sjá um systkinin. Á meðan pabbi reynir að fá pössun hjá vinum og nágrönnum kaupa systkinin flugmiða heim til Íslands en eini gallinn er að mamma er ekki heima og svarar ekki símanum. Þess vegna fylgir pabbi systkinunum til Íslands í þeirri trú að mamma finnist fljótt.

„Sagan var upphaflega skrifuð sem sjónvarpsþáttaröð en það gekk illa að fjármagna framleiðsluna, þannig að við byrjum allavega á bók,“ segir Kolbrún Anna. Hún útilokar þó ekki að sagan fari á hvítatjaldið. „Kannski verður þetta að bíómynd eða þáttum að lokum, það kemur í ljós.“

Þær standa nú fyrir söfnun á söfnunarsíðunni Karolina Fund til þess að fá aðstoð við að gefa út söguna, bæði sem rafbók og á prenti. „Textinn er þegar kominn en okkur langar að gæða persónur og söguna lífi með fallegum teikningum eftir Láru Garðarsdóttur,“ segir Kolbrún Anna.

Kolbrún segir söguna taka á ýmsum staðalímyndum, að skipt sé um kynjahlutverk og að jafnrétti sé að leiðarljósi. „Á ferðalagi sínu hitta persónurnar aðrar persónur sem umsnúa hugmyndum um staðalímyndir og hlutverk kynjanna. Þær hitta meðal annars bónda sem er kona og mótorhjólagengi sem skipað er karlmönnum sem er hjúkkur og tannlæknar. Við snúum upp á staðalímyndir víðsvegar,“ útskýrir Kolbrún Anna.

Söfnunin er ný hafin en þær hafa strax fengið góð viðbrögð og eru bjartsýnar á framhaldið.