Caterham ætlar til Abú Dabí

Caterham undirbýr nú endurkomu til keppni í Formúlu 1. Eftir að hafa misst af keppninni í Texas mun liðið einnig missa af keppninni í Brasilíu um helgina. Caterham ætlar að koma til Abú Dabí sem er lokakeppni tímabilsins.

Caterham gat ekki mætt af fjárhagslegum ástæðum til keppni í Texas og vegna þess að bílarnir eru fluttir beint frá Texas til Brasilíu missir liðið líka af keppninni þar.

Bráðabyrða þátttökulisti fyrir 2015 var birtur nýlega. Á honum er að finna bæði Caterham og Marussia sem er í sömu stöðu og Caterham. Marussia mun ganga undir nafninu Manor. Það verður auðvelt að venjast því.

„Við erum að vona að núna taki nýr eigandi við sér og borgi okkur þáttökugjaldið, sem við höfum þegar greitt og klári hönnun 2015 bílsins,“ sagði Finbarr O´Connell, skipaður fjármálastjóri Caterham sem segir að ákveðið hafi verið að greiða þátttökugjaldið til að gera liðið söluvænna.

Það myndi líka auðvelda Caterham lífið ef það mætir til keppni í Abú Dabí. „Ég tel að við séum nokkuð örugg um að við mætum til Abú Dabí, annað kæmi mikið á óvart,“ sagði O´Connell að lokum.