Sebastian Cappelen efstur eftir fyrsta hring í Mississippi

Danski kylfingurinn Sebastian Cappelen leiðir á Sanderson Farms Championship sem fram fer á Jackson vellinum í Mississippi en hann lék fyrsta hring á 65 höggum eða sjö undir pari.

Það virðist eitthvað við að gera hluti í fyrsta skiptið sem dregur fram það besta í Cappelen en í fyrsta mótinu sínu á Web.com mótaröðinni fyrir hálfu ári sigraði hann á Air Capital Classic mótinu.

Sanderson Farms Championship er einnig fyrsta mót hans á PGA-mótaröðinni en Cappelen lék frábært golf og eftir að hafa fengið skolla á fyrstu holuna fylgdi hann því eftir með átta fuglum síðar á hringnum.

Í öðru sæti, tveimur höggum á eftir Cappelen eru þeir Scott Pickney, Robert Streb og Nick Taylor á fimm höggum undir pari en margir kylfingar deila fimmta sætinu á fjórum höggum undir, meðal annars fyrrum besti kylfingur heims, David Duval.

Annar hringur verður leikinn í dag en bein útsending verður á Golfstöðinni frá klukkan 19:00.