Geir Ólafs bauð sjónvarpskokki út að borða

„Ég hef aldrei nokkurn tímann haft áhuga á því að elda. En ég hef alltaf haft áhuga á því að skrifa. Þannig byrjaði ég með bloggið sem síðan þróaðist út í einfaldar og undarlegar uppskriftir,“ segir sjónvarpskokkurinn Guðrún Veiga Guðmundsdóttir. Hún hefur vakið athygli fyrir líflega framkomu í matreiðsluþættinum Nenni ekki að elda á sjónvarpsstöðinni iSTV.

Bloggið kom henni einmitt í sjónvarpið en það vakti athygli forsvarsmanna stöðvarinnar og höfðu þeir samband við hana um að búa til svokallaðan anti-matreiðsluþátt.

„Ég geri ekki þessar hefðbundnu uppskriftir. Ég er meira í þessu letilega,“ segir Guðrún Veiga. En er hún löt í raun og veru?

„Já, frekar. Ég skammast mín ekkert fyrir það,“ segir hún og skellihlær. Guðrún Veiga hefur ekki síst vakið athygli fyrir frjálslegt fas og virðist sem svo að hún sé ávallt undir áhrifum áfengis á skjánum.

„Ég sver það að ég er ekki alltaf full. Þetta er bara sjónvarp. En ég er sérstaklega lunkin leikkona þegar ég er með rauðvínsglas í hendi.“

Í þáttunum fær Guðrún Veiga góða gesti til að elda með sér.

„Ég er búin með fyrstu seríuna og hef fengið til mín Leoncie, Geir Ólafs, Ásgeir Kolbeins og Siggu Kling,“ segir þessi nýjasti sjónvarpskokkur Íslands og ekki stendur á svörunum þegar hún er spurð hvaða gestur stóð upp úr.

„Ásgeir Kolbeins og Geir Ólafs. Geir vildi endilega bjóða mér út að borða eftir þáttinn. Það er vandræðalegt fyrir mig að horfa á þessa þætti sjálf en ég skildi af hverju hann bauð mér út þegar ég horfði á þáttinn. Ég hefði alveg eins getað rifið mig úr fötunum, svo mikið var daðrað. Ég fór ekki með honum út að borða og ég sé pínulítið eftir því,“ segir Guðrún Veiga en ætlar þó að halda sig við að afþakka boðið. „Maður á ekki að blanda vinnunni saman við ánægju þó að ég hafi sjaldan hitt jafn almennilegan mann og Geir.“ 

Guðrún Veiga situr nú við skrif á meistararitgerð í mannfræði og vonast til að útskrifast í febrúar á næsta ári. Líf hennar hefur svo sannarlega tekið stakkaskiptum, allt út af einu, litlu bloggi. Næst á dagskrá er bókaútgáfa.

„Ég skrifaði undir bókasamning við Sölku í gær en bókin mín kemur út fyrir jólin. Það má segja að þetta sé matreiðslubók letingjans,“ segir Guðrún Veiga brosandi. Hún bjóst ekki við þessari velgengni.

„Þetta er súrrealískt. Eina stundina stend ég í eldhúsinu að mixa oreopopp og hina stundina er ég að gefa út matreiðslubók.“