Nokkur halli á rekstri Landspítala

Ársfundur Landspítala, sem gengur undir yfirskriftinni „Þjóðarsjúkrahús á tímamótum“ hófst klukkan 13 í dag. Í ársreikningi sem lagður var fram má sjá að rekstur spítalans var erfiður á síðasta ári og var nokkur halli á rekstrinum.

Fjárheimildir og sértekjur Landspítala árið 2013 námu 43.809 milljónum króna og heildargjöld um  45.293 milljónum króna. Á milli áranna 2012 og 2013 hækkuðu heildarrekstrargjöld spítalans um 11,3% á verðlagi hvors árs. Launagjöld voru stærsti kostnaðarliðurinn eða ríflega 70% útgjalda og er það svipað og síðustu ár, þrátt fyrir að launagjöld hafi hækkað um 10,6% á milli ára.

Rekstrargjöld, önnur en laun, eru tæplega 26% af heildargjöldum sem jafnframt er heldur lægra hlutfall en síðustu ár. Starfsmönnum spítalans fjölgaði um  1,9%  árið 2013 en dagvinnustöðugildum fækkaði um 0,6%. Þá var 1.292 milljónum króna varið til tækjakaupa, sem nemur 128% hækkun miðað við árið á undan. Hækkunina má rekja til viðbótarfjármagns sem veitt var til tækjakaupa á fjárlögum ársins 2013 og hins vegar gjafafjár.

Fyrir Alþingi liggur nú frumvarp til lokafjárlaga fyrir árið 2012 þar sem lagt er til að Landspítali fái viðbótar fjárheimild að fjárhæð 2.223 milljónir króna vegna ársins 2012, sem skuli mæta hluta hallarekstrar frá árunum fyrir 2010 en eins og fram hefur komið var spítalinn rekinn án halla árin 2010, 2011 og 2012 þrátt fyrir fordæmalausan niðurskurð fjárveitinga. Stefnt er að hallalausum rekstri á yfirstandandi ári.

Fram kom á ársfundinum að Landspítali sé rekinn fyrir mun minna fé en stór sjúkrahús í nágrannalöndunum. Nefnt var að hver lega sjúklings á Karolinska sjúkrahúsinu í Stokkhólmi væri að jafnaði 58% dýrari en á Landspítala. Vandséð sé að komist verði mikið lengra í hagræðingu á spítalanum nema með hagkvæmari lausnum í húsnæðismálum hans.