Vísar skorti á kæruferli til Umboðsmanns Alþingis

Danski fjárfestirinn Lars Grundtvig ætlar að kæra ti Umboðsmanns Alþingis verklag tengt undanþágum frá gjaldeyrishöftum.

Fram kemur í bréfi Grundtvigs til fjármálaráðherra undir lok október að hann furði sig á svari ráðuneytisins um að ekki sé hægt að kæra þangað ákvörðun Seðlabankans að hafna umsókn Grundtvigs um undanþágu frá gjaldeyrishöftum.

Áður hefur komið fram að Grundtvig segist þurfa undanþágu vegna breytinga á erfðalögum í Danmörku.

„Í þessari stöðu verður kvörtun send Umboðsmanni. Síðan kemur í ljós hvor þjóð þinni er stjórnað af lögum eður ei,“ segir Grundtvig í bréfi sínu til fjármálaráðherra.

Hann bendir á að ekki sæmi þjóðinni að „halda áfram að stela eignum“ annara. Það komi síðar í bakið á mönnum. „Land þitt gerir sitt ítrasta til að tapa vinum sínum.“

Þegar fimm mánuðir voru liðnir frá því að Grundtvig sótti um undanþágu, í janúar síðstliðnum, skrifaði hann Seðlabankastjóra bréf með samantekt á máli sínu. 

Þar segist hann vonast eftir svörum fljótlega. Hinn valkosturinn sé að leita svara í gegn um þingmann sinn á Evrópuþinginu. Það sé hins vegar neyðarúrræði.

Morten Løkkegaard, Evrópuþingmaður danska hægriflokksins Venstre, lagði fram fyrirspurn á þinginu 19. febrúar. 

Þá spurði hann framkvæmdastjórn ESB um áhrif gjaldeyrishaftanna á EES-samninginn og hvort hún hyggðist gera breytingar á samningnum vegna brota Íslands á ákvæði um frjálst flæði fjármagns. 

Eins spurði hann hvort framkvæmdastjórnin teldi sig gæta hagsmuna fyrirtækja innan ESB sem hefðu þá verið föst með fé á Íslandi í hálfan áratug vegna haftanna.

Í svari framkvæmdastjórnarinnar í apríl eru höftin enn sögð samrýmast EES-samningnum. Draga ætti úr þeim hægt og rólega.