Fer í fornleifaleiðangur til Kanada á tíræðisaldri

Páll Bergþórsson, fyrrverandi Veðurstofustjóri og rithöfundur, lætur ekki deigan síga þó hann sé kominn á tíræðisaldur. Á fimmtudag heldur hann ásamt Braga Bergþórssyni og Bjarna F. Einarssyni fornleifafræðingi til Nova Scotia í Kanada ætla þeir að huga að hugsanlegum fornleifum sem tengjast ferð Þorvalds Eiríkssonar fyrir um 1000 árum. Viðfangsefnið hefur lengi verið Páli hugleikið og ritaði hann bókina Vínlandsgátan sem fjallar um landafundi norrænna manna í Vesturheimi.

Páll kveðst nýlega hafa fengið upplýsingar um vörðu við Nova Scotia sem Þorvaldur gæti hafa reist úr kjöl skip síns. „Ég hef heyrt um þetta, að varðan sé á tilteknu nesi,“ segir Páll. „Þá datt mér það í hug að Þorvaldur hlyti að hafa haft eitthvað til að styðja við þennan kjöl. Það einfaldasta væri að hlaða á hann grjóti, búa til vörðu sem gæti staðið í mörg ár, jafnvel þúsund ár.“

Páll fagnar 91 árs afmælisdegi sínum í ferðinni. Hann kveðst heilsuhraustur og segir að það verði gott að fá nýtt loft í lungun. Jafnframt mun hann halda fyrirlestur í New York um Vínlandsferðirnar.

„Ég ætla að reyna að hvetja menn til þess að fara nú að taka mark á Íslendingasögunum - Vínlandssögunum,“ segir Páll.

Daglegar veðurspár

Páll er líklega einn elsti Facebook notandi landsins. Þar er hann afkastamikill og ritar daglega tíu daga veðurspá sem þúsundir lesa.

„Það er alveg prýðilegt að hafa eitthvað verkefni þegar maður er kominn á eftirlaunaaldurinn og er ég búinn að vera þar í 20 ár. Það styrkir mann að senda eitthvað frá sér. Þetta geri ég á hverjum degi,“ segir Páll en hversu margir fylgja honum eftir á Facebook?

„Þeir eru 4800,“ segir Páll Bergþórsson, fyrrverandi Veðurstofustjóri og rithöfundur.