Á ótrúlega góða vini

„Þetta er stund sem ég mun aldrei gleyma og ég á ekki orð til þess að lýsa því hvað ég er þakklátur fyrir að eiga þessa yndislegu vini sem standa svo sannarlega við bakið á mér,“ segir hinn átján ára gamli Marteinn Högni Elíasson, nemi í Verzlunarskóla Íslands. Þegar hann mætti í skólann í vikunni beið hans fjöldi samnemenda á Marmaranum, sem er samkomusvæði Verzlunarskólans, og klæddust þeir bolum sem eru seldir til styrktar grunnrannsóknum á brjóstakrabbameini og til að minnast móður Marteins Högna.

Móðir Marteins Högna, Kristbjörg Marteinsdóttir, Kittý, eins og hún var jafnan kölluð, lést af völdum brjóstakrabbameins í lok árs 2009 eftir að hafa barist við sjúkdóminn í 6 ár. „Þegar mamma greindist með krabbameinið ákvað hún strax að láta ekkert stöðva sig og gekk til að mynda á hverjum og gerði alltaf eittvað á hverjum degi,“ segir Marteinn Högni. Framan á áðurgreindum bol stendur einmitt „Eitthvað á hverjum degi“ sem var einmitt hugsjón Kittýjar.

Hún hefði orðið fimmtug á árinu og var virkur og ötull félagi í styrktarfélaginu Göngum saman, sem er grasrótarfélag sem styrkir grunnrannsóknir á brjóstakrabbameini, og átti margar hugmyndir að fjáröflun til rannsókna.

„Við fjölskyldan eigum hugmyndina að bolunum saman en amma mín hafði mesta frumkvæðið. Mínir nánustu vinir seldu svo boli í skólanum og þegar ég mætti voru nánast allir í bolum,“ bætir Marteinn Högni við.

Systir Marteins Högna, Sigurlaug Tara, var tengiliður við vini hans í skólanum og því vissi hann ekkert fyrr en hann mætti í skólann. Bolirnir eru hluti af því sem selt verður til styrktar sjóðnum.

Þá fer Söfnunar- og minningarganga Kittýjar fram í dag en gengið verður frá Héðinsfirði um Héðinsfjarðargöng til Siglufjarðar og að íþróttamiðstöðinni að Hóli þar sem seld verður súpa og brauð. „Mamma ólst upp á Siglufirði og þess vegna fer gangan fram þar,“ bætir Marteinn Högni við.

Gangan sem er gjaldfrjáls hefst klukkan 16.00 en fríar rútuferðir verða frá Hóli klukkan 15.00 að upphafsstað göngunnar. Þarna gefst einstakt tækifæri til að fara fótgangandi um Héðinsfjarðargöng. Stofnaður hefur verið reikningur til minningar um Kittýju og rennur allur ágóði til grunnrannsókna á brjóstakrabbameini í samvinnu við Göngum saman, reikningsnúmerið er 1102-26-121264 og kennitala 250645-3179.