Ótryggt ástand í Írak

Átök hafa geisað í landinu undanfarið.  Uppreisnarmenn úr samtökunum Íslamskt ríki í Írak og Austurlöndum nær, eða ISIS, hafa á síðustu dögum náð borgunum Mosul og Tikrit á sitt vald, sem bættust þá við borgirnar Ramadi og Falluja, sem hafa verið á þeirra valdi frá því í byrjun árs.

Kúrdar lýstur því hinsvegar yfir í dag að olíuborgun Kirkuk í norðurhluta Írak sé nú á þeirra valdi. Borgina hafi þeir tekið til að koma í veg fyrir að hún félli í hendur uppreisnarmanna ISIS, stjórnarherinn hefur flúið svæðið í nágrenni Kirkuk undan árásum uppreisnarmanna.

Talið er að uppreisnarmenn hyggist forðast bardaga við hersveitir Kúrda og ætli sér frekar að sækja í átt til höfuðborgarinnar Bagdad úr vestri, frá Fallujah, sem þeir hafa á valdi sínu. Íbúar í borginni söfnuðu margir hverjir matarbirgðum í dag og bjuggu sig undir komandi daga.

Fjöldi fólks er á flótta undan uppreisnarmönnum og haft var eftir héraðsstjóra í Mosul að unnið sé að því að því að fá landsmenn til þess að mynda vopnaðar sveitir sem myndu gegna hlutverki við að ná borgunum aftur.