Veitir styrk vegna kynningar á íslenskri tónlist í Hollandi

Ríkisstjórnin hefur ákveðið að veita Útón, útflutningsskrifstofu íslenskrar tónlistar, 12 milljóna króna fjárstyrk af ráðstöfunarfé sínu til að mæta kostnaði vegna þátttöku Íslands á Eurosonic-tónlistarhátíðinni í janúar næstkomandi.

Í tilkynningu frá forsætisráðuneytinu segir að gróska íslensks tónlistarlífs hafi verið mikil á undanförnum árum og hafi hún vakið verðskuldaða athygli erlendis. „Um miðjan janúar nk. verður Eurosonic-tónlistarhátíðin haldin í Hollandi, sem er stærsta slík hátíð sem haldin er í Evrópu, og verður Ísland í öndvegi á hátíðinni. Í samræmi við það taka óvenju margar íslenskar hljómsveitir og listamenn, alls 19 talsins, þátt í hátíðinni að þessu sinni fyrir milligöngu Útón, útflutningsskrifstofu íslenskrar tónlistar. Sérstök umfjöllun verður um íslenska tónlist á hátíðinni m.a. með sérstökum viðburðum og pallborðum.“

Umtalsverður kostnaður fylgir svo umfangsmikilli þátttöku af hálfu Íslands á tónlistarhátíðinni og því sé mikilvægt er að styðja við þennan stóra vaxtarsprota íslenskrar menningar og „því ákvað ríkisstjórnin að veita sérstakan fjárstyrk til verkefnisins af ráðstöfunarfé sínu“.