Verðsamráðsmálið tekið fyrir í febrúar

Aðalmeðferð í máli sérstaks saksóknara á hendur þrettán starfsmönnum Byko, Húsasmiðjunnar og Úlfsins mun fara fram í febrúar á næsta ári. Þá verða rúmlega fjögur ár liðin síðan rannsókn málsins hófst. Málið er rekið fyrir Héraðsdómi Reykjaness en vegna fjölda sakborninga og verjenda mun aðalmeðferð fara fram í Héraðsdómi Reykjavíkur.

Fyrirtaka í málinu fór fram í morgun þar sem verjendur sakbornina lögðu fram greinargerðir þar sem útskýrðar voru ástæður þess hvers vegna farið væri fram á sýknu í málinu. Þá fór einn verjenda fram á að máli á hendur sínum skjólstæðingi yrði vísað frá dómi. Allir þrettán neituðu sök þegar málið var þingfest í héraði í maí síðastliðnum.

Sjá einnig: „Við erum að blæða báðir tveir“

Mennirnir eru sakaðir um að hafa átt í verðsamráði til að koma í veg fyrir að verslanirnar ættu í samkeppni. Gögn sérstaks saksóknara telja um 5000 blaðsíður en stór hluti þeirra eru símtöl og tölvupóstssamskipti mannana. Rannsókn stóð yfir í um þrjú ár áður en ákæra var gefin út í maí síðastliðnum.

Málið er athyglisvert fyrir þær sakir að um refsimál er að ræða á hendur mönnum þrettán. Aðeins einu sinni áður hefur verið höfðað refsimál á hendur einstaklingum hér á landi. Þá voru forstjórar Olís, Skeljungs og Esso sakaðir um verðsamráð. Héraðsdómur Reykjavíkur vísaði málinu hins vegar frá vegna annmarka í ákæru. Úrskurðinn í heild má sjá hér.

Mennirnir þrettán eru á öllum aldri og gegndu ólíkum stöðum innan fyrirtækisins allt frá framkvæmdastjórum niður í menn í söluverinu. Sá elsti er í dag 74 ára en sá yngsti var tvítugur þegar meint brot áttu sér stað. Athygli vekur að forstjórar fyrirtækjanna þriggja sæta ekki ákæru.

Meint brot áttu sér stað á tímabilinu 13. september 2010 til 3. mars 2011 með skipulagðri upplýsingagjöf um verð og tilboðskjör sérgreindra grófvörutegunda, einkum bygginga- og timburvara, í símtölum milli starfsmanna fyrirtækjanna sem var til þess fallin að hafa áhrif á verð, afslætti, álagningu og önnur viðskiptakjör innan umræddra fyrirtækja. Krafist er að mennirnir verði dæmdir til refsingar og greiðslu alls sakarkostnaðar.