Stuðningur við ríkisstjórnina aldrei mælst minni

Stuðningur við núverandi ríkisstjórn hefur aldrei mælst lægri en fylgi stjórnar Framsóknarflokks og Sjálfstæðiflokks er nú 33 prósent.

Könnunin var á gerð á tímabilinu 29. október til 4. nóvember. Síðast mældist stuðningur ríkisstjórnarinnar 34,3 prósent.

Fylgi Sjálfstæðisflokksins mældist nú 23,6 prósent, borið saman við 26,1 prósent í síðustu könnun og 25,2 prósent í lok september.

Fylgi Bjartrar framtíðar mældist nú 18,6 prósent, borið saman við 20,0 prósent í síðustu könnun. Fylgi Samfylkingarinnar mældist nú 16,1 prósent, borið saman við 15,1 prósent í síðustu könnun. Fylgi Framsóknarflokksins mældist nú 12,3 prósent, borið saman við 10,1 prósent í síðustu könnun.

Fylgi Pírata mældist nú 11,3 prósent, borið saman við 12,2 prósent í síðustu könnun og mældist fylgi Vinstri-grænna nú 10,7 prósent, borið saman við 10,0 prósent í síðustu könnun. Fylgi annarra flokka mældist undir 2 prósent.

Lagðar voru allt að þrjár spurningar fyrir svarendur um stuðning þeirra við stjórnmálaflokka. Allir voru spurðir spurningar:

1: „Ef kosið yrði til Alþingis í dag, hvaða flokk myndir þú kjósa?“. Þeir sem svöruðu „Veit ekki/óákveðin(n)“ við spurningu 1 voru því næst spurðir spurningar 2: „En hvaða flokkur yrði líklegast fyrir valinu?“. Ef aftur var svarað „Veit ekki/óákveðin(n)“ þá voru þátttakendur að lokum spurðir spurningar 3: „Hvort er líklegra að þú kysir Sjálfstæðisflokkinn eða einhvern hinna flokkanna?“. Fjölda þeirra sem svaraði "einhvern hinna“ í spurningu 3 var skipt milli annarra flokka en Sjálfstæðisflokksins í sama hlutfalli og fylgi þeirra var skv. spurningum 1 og 2. Samtals voru 77,0% sem gáfu upp afstöðu til flokka, aðrir kváðust óákveðnir (6,5%), myndu skila auðu (7,8%), myndu ekki kjósa (2,5%) eða vildu ekki gefa upp afstöðu sína (6,2%). Myndin sýnir niðurstöðu könnunar að viðbættum efri og neðri vikmörkum miðað við 95% öryggisbil ásamt samanburði við síðustu könnun þar á undan.