NSA rannsakar störf yfirmanns hjá stofnuninni fyrir einkafyrirtæki

Bandaríska þjóðaröryggisstofnunin, NSA, hefur hafið rannsókn á störfum yfirmanns tæknideildar stofnunarinnar vegna hlutastarfs hans hjá einkafyrirtæki sem fyrrverandi yfirmaður NSA, Keith Alexander, stofnaði. Málið þykir vekja upp spurningar um hversu skýrar línurnar eru á milli starfa stjórnvalda og einkafyrirtækja.

Þróar hugbúnað fyrir banka

Reuters fjallar um málið á vef sínum í kvöld og greinir frá því að samkvæmt samkomulagi við NSA sé tæknistjóranum, Patrick Dowd, heimilað að vinna allt að 20 klukkustundir á viku fyrir IronNet Cybersecurity Inc. Reuters hefur fengið staðfestingu á fyrirkomulaginu hjá núverandi og fyrrverandi starfsmönnum stofnunarinnar.

IronNet Cybersecurity vinnur að þróun hugbúnaðar til að verja tölvukerfi fyrir árásum. Lausnin er markaðssett fyrir fjármálastofnanir og önnur einkafyrirtæki.

Óljóst hvað hefur gerst

„Ég vildi að Pat myndi halda áfram hjá NSA. Hann vildi vinna með okkur,“ sagði Alexander í samtali við Reuters um málið. Hann segir að stofnunin hafi samþykkt þetta fyrirkomulag og að vilji hafi verið til að halda Dowd í það minnsta í hlutastarfi hjá NSA vegna sérþekkingar hans. 

Alexander viðurkennir að fyrirkomulagið sé sérstakt. „Mér fannst bara að það væri rangt fyrir NSA og þjóðina að hann myndi hætta,“ segir hann. Í sameiningu hafa þeir Dowd lagt fram umsóknir um einkaleyfi á þeim tæknilausnum sem þeir þróuðu í sameiningu hjá NSA. Alexander segir þó fyrirtækið ekki vinna að þróun neins sem byggir á þeim einkaleyfum.

Staðfestir rannsókn

Ekki liggur fyrir hversu mikla vinnu – ef einhverja – Dowd hefur innt af hendi fyrir IronNet. Þá virðist samkomulagið vera í samræmi við lög. Talskona NSA hefur hinsvegar staðfest að málið sé til rannsóknar og að það sé tekið alvarlega. 

„Þetta mál er til skoðunar hjá stofnuninni. Þó að NSA geti ekki tjáð sig um mál einstakra starfsmanna, þá tekur NSA siðareglum og reglugerðum alvarlega í öllum deildum þess,“ segir í yfirlýsingu Vanee Vines, fjölmiðlafulltrúa NSA, vegna fyrirspurna Reuters.