Vigdís Finnbogadóttir tryggði sér eintak

Útgáfu bókarinnar Handan minninga – Hvers vegna heilabilun breytir öllu eftir Sally Magnusson var fagnað í gær í Eymundsson, Austurstræti en Bókaútgáfan Salka gefur bókina út.

Bókin er  bersögul og áleitin fjölskyldusaga sem skrifuð er af ást, virðingu og söknuði en leiftrandi húmorinn er aldrei langt undan þrátt fyrir erfiðar kringumstæður. Sagan er um leið áhugaverð úttekt á aðstæðum aðstandenda sjúklinga með heilabilun.

Sally Magnusson hefur hlotið margvísleg verðlaun fyrir blaðamennsku og útvarpsþáttagerð og starfað sem fréttaþulur hjá BBC í mörg ár. Hún er dóttir hinnar vinsælu blaðakonu Mamie Baird, sem bókin fjallar um og íslenska sjónvarpsmannsins góðkunna, Magnúsar Magnusson, sem flutti barnungur til Skotlands en hélt ævarandi tryggð við heimahagana.

Fjöldinn allur af fólki lagði leið sína í útgáfuteitið, þar á meðal frú Vigdís Finnbogadóttir sem tryggði sér að sjálfsögðu eintak af bókinni.