Fór að ráðum Obama og fékk sér hamborgara

David Cameron, forsætisráðherra Breta, fór að ráðum Barack Obama Bandaríkjaforseta og stoppaði í hamborgara á skyndibitastaðnum Five Guys eftir landsfund Íhaldsflokksins í dag. Cameron kom við í kvöldmat ásamt eiginkonu sinni Samönthu á leið sinni af ráðstefnunni.

„Hann sagðist hafa viljað fá sér alvöru mat og að Obama hafi mælt með staðnum við sig þegar hann var í Bandaríkjunum,“ segir Joshua Coelho, verslunarstjóri Five Guys, í samtali við Daily Mail um samskipti sín við forsætisráðherrann.

Í frétt Daily Mail um kvöldverðinn kemur fram að hjónakornin hafi pantað sér ostborgara, hamborgara, sitthvorn Budweiser-bjórinn og vatnsflösku. Cameron var hin alþýðlegasti og spjallaði við starfsmenn og aðra gesti á meðan hann beið eftir matnum.