Vikan á Vísi: Guðni Ágústsson, G-bletturinn og Gunnar Nelson

Guðni Ágústsson, Kópavogsbúi sem sérhæfir sig í G-blettsfullnægingum kvenna og bardagi Gunnars Nelson í Stokkhólmi í gærkvöldi var á meðal þess sem vakti athygli lesenda Vísis í liðinni viku. Þá vöktu klámmyndastellingarnar sem virka ekki í alvörunni athygli margra auk yfirlýsingar Óla Palla um að hann væri fáviti að hafa kosið Framsókn. Þá horfðu margir á viðtal við móður Tinnu Ingólfsdóttur heitinnar.

Guðni sagður ekki drengur góður

Rimma Ólafs M. Magnússonar, hjá Kú Mjólkurbú ehf, og Guðna Ágústssonar, fyrrum landbúnaðarráðherra, vakti athygli í vikunni. Þeir höfðu mæst í sjónvarpsþættinum Eyjunni á sunnudeginum og mætti Guðni Ólafi af fullri hörku. Hann beindi talinu meðal annars að meintri gjaldþrotasögu Ólafs og sagði Ólafur í samtali við Vísi að honum hefði sárnað framkoma Guðna í sinn garð.

Klámmyndastellingar sem virka ekki í alvörunni

Frank Kopola tók saman lista fyrir Cosmopolitan yfir tíu kynlífsstellingar sem eru vinsælar í klámmyndum. Kopola sýndi fram á af hverju þær virka ekki í raunveruleikanum og birti Vísir myndir af nokkrum vinsælum stellingum.

Sérhæfir sig í G-blettsfullnægingum

Frétt um Kópavogsbúa sem sérhæfir sig í G-blettsfullnægingum vakti áhuga hjá mörgum. Maðurinn tekur á móti konum heima hjá sér þar sem hann býður þeim upp á nudd, djúpa slökun og rétt hússins, G-blettsfullnægingu.



Ekki eldra en 25 ára í framhaldsskóla

Aðsend grein eftir Aðalbjörgu Stefaníu Helgadóttur hjúkrunarfræðing um hugmyndir stjórnvalda að takamarka aðgang fólks eldri en 25 ára að framhaldsskólum var mikið lesin. Í greininni segir meðal annars: „Það var vegna frelsis í menntamálum á Íslandi árið 2004, sem ég er sú sem ég er í dag. Þær Aðalbjargir sem lífið hefur gefið sömu gjafir og mér munu því miður ekki geta fetað mína slóð ef fyrirætlanir menntamálaráðherra ná fram að ganga. Því Aðalbjargir ársins 2015 geta aðeins fetað mína slóð ef þær eru yngri en 25 ára.“

„Bara ef hún hefði fengið aðeins meiri tíma“    

Viðtal við Ingu Völu Jónsdóttur, móður Tinnu Ingólfsdóttur heitinnar, vakti mikla athygli á Vísi en Edda Sif Pálsdóttir tók viðtal við Ingu Völu fyrir Ísland í dag. Tinna var baráttukona sem opnaði umræðuna um dreifingu mynda af nöktum stúlkum undir lögaldri á netinu en hún varð bráðkvödd á heimili sínu í maí síðastliðnum, aðeins 21 árs að aldri.



Var fáviti að kjósa Framsóknarflokkinn

Ólafur Páll Gunnarsson, dagskrárgerðarmaður á Rás 2, játaði á Facebook-síðu sinni að hafa kosið Framsóknarflokkinn og sagði að það væri fávitum eins og sér að kenna flokkurinn væri við völd. Tilefni játningar Óla Palla voru hugmyndir Vigdísar Hauksdóttur um að selja Rás 2 en Óli Palli sagðist algjörlega gáttaður á hugmyndum hennar í samtali við Vísi.

Ótrúlegur ferill Gunnars Nelson

Vísir hitaði vel upp fyrir bardaga Gunnars Nelson í vikunni og var meðal annars farið yfir glæsilegan feril bardagakappans.