Féll fyrir bardagamanni og flutti til Ástralíu

Tónlistarkonan Védís Vantída Guðmundsdóttir elti ástina alla leið til Brisbae í Ástralíu þar sem hún býr með ástralska MMA-kappanum Gokhan Turkyilmaz.

Við byrjuðum á því að spyrja Védísi hvernig þau kynntust?   „Við kynntumst á Íslandi í fyrra sumar. Ég var að æfa hjá Mjölni og hann var þar einnig að þjálfa sig fyrir bardaga sem hann átti í Englandi en hann er atvinnumaður í blönduðum bardagaíþróttum,“ segir Védís.  

„Hann var í sambandi á þeim tíma þannig að það var ekkert mikið sem fór okkar á milli. En þegar við vorum svo bæði einhleyp þá byrjuðum við að spjalla og urðum fljótt náin.“   

„Við höfðum alls ekki neitt í hyggju þar sem við vorum heimsálfanna á milli og því ekki beint hægt að ana út í hlutina en tengingin var einlæg. Við höfðum um margt að spjjalla og mér fannst ég hafa þekkt hann mun lengur en raunin var,“ segir hún.  

„Þrátt fyrir að vera frá ólíkum menningarheimum og með mjög ólíkt uppeldi þá deilum við sömu gildum og horfum sömu augum á það sem skiptir máli.“

Dóttirin kemur út von bráðar til Ástralíu 

Elíana, 7 ára gömul dóttir þín, býr hún úti með ykkur? „Við vorum á Íslandi í vor í nokkra mánuði þar sem fjölskyldan vildi fá að hitta hann. Við héldum svo til Taílands og þaðan hingað til Ástralíu til að gera allt klárt áður en Elíana dóttir mín kemur.“

„Þetta er bókstaflega fjarlægasta landið frá Íslandi á hnettinum og því ekki hægt að flakka á milli. Ég þurfti að fara í gegnum mikið ferli með að sækja um Visa fyrir mig og hana, fá okkur nýtt húsnæði, finna mér vinnu og sjá hvernig landið liggur.“ 

„En þetta er allt að smella saman og foreldrar mínir koma hingað í byrjun desember með hana. Það eru ekki til næg orð sem lýsa því hvað það hefur verið erfitt að vera frá henni en við höfum þurft að líta á heildarmyndina og við munum sameinast à ný von bráðar.“

Elska að hreyfa sig

„Við elskum bæði að hreyfa okkur og stunda líkamsrækt. Það er frábært að hafa hann sem persónulegan þjálfara bæði með kickboxið og í annarskonar hreyfingu en hann vinnur við að þjálfa ásamt því að berjast og vinna sem flugvélaverkfræðingur.“

„Við erum einnig dugleg að gera hluti saman, njóta náttúrunnar, fara á nýja staði, út að borða, tónleika og þess háttar. Við erum meðvituð um að lífið er til að lifa því og það þarf ekki alltaf að kosta fúlgu fjár.“ 

Kvartar ekki yfir veðrinu

„Þannig að við ákváðum að ég mundi gera mér ferð til Ástralíu sem ég gerði svo í október í fyrra. Eftir það var alveg víst hvað við vildum og hvert þetta stefndi. Við búum núna í Brisbae hér í Ástralíu. Það er alveg yndislegt og Íslendingurinn ég kvartar aldeilis ekki yfir veðrinu.“

„Við ræktum hvort annað á margan hátt. Eins og ég segi þá komum við frá ólíkum menningarheimum. Við höfum lifað lífinu á ólíkan hátt en deilum þeim gildum sem skipta máli.“ 

„Við elskum hvað við höfum bæði fram að færa og virðum hvort annað þegar við erum ósammála. Þannig komumst við alltaf að góðum millivegi. Ég ólst upp við tvo menningarheima og það hefur gefið mér mikið við að sjá heiminn öðruvísi og aðlagast ólíkum aðstæðum og fólki. Ég er afskaplega þakklát fyrir það hvað ég hef aldrei séð hlutina í neinum kassa.“ segir Védís.

Hjartalagið skiptir máli

„Það hefur aldrei skipt mig máli hvaðan fólk er, á hvað það trúir, hvernig það lítur út, eins lengi og það er með gott hjarta.  Til dæmis er mamma búddisti, hann er múslimi, pabbi var organisti fyrir þjóðkirkjuna í 40 ár en er mjög vísindalega þenkjandi, systir mín er mjög andleg, barnsfaðir minn er í Hvítasunnukirkjunni og svo er ég blanda af vísindalegu, sögulegu og andlegu.“

„Eins lengi og þú ert að rækta þig til hins betra og velur þína leið til þess þá er það ávallt af hinu góða.“