Landsliðið í þungarokki slær upp veislu

Þakið mun líklega fara af Vodafone-höllinni í dag er þungarokkshátíðin Rokkjötnar fer fram í annað skipti. Þarna mæta til leiks flestar bestu þungarokkshljómsveitir landsins með Skálmöld í broddi fylkingar.

Húsið opnar klukkan 15.00 í dag og Melrakkar stíga svo á stokk klukkan 16.00 og flytja lög Metallica fyrir lýðinn.

Svo kemur hvert bandið á fætur öðru upp á svið og Skálmöld lýkur svo kvöldinu með stæl. Kæmi ekki á óvart ef bandið spilaði efni af væntanlegri plötu sveitarinnar sem ber heitið Með vættum.

Átta klukkutímar af þungarokki og má búast við því að svitinn renni í stríðum straumum og flasan þeytist í allar áttir.

Dagskráin:

16.00: Melrakkar

16.50: In Memoriam

17.40: Strigaskór nr. 42

18.30: Beneath

19.25: Brain Police

20.30: Sólstafir

21.45: Dimma

23.00: Skálmöld