Þýskur ljósmyndari leitar að konu og starfi á Íslandi

Í skilaboðum sem ganga nú manna á milli á Facebook óskar þýski ljósmyndarinn Frank Tschöpe eftir hjálp við að finna vinnu, heimili og kærustu á Íslandi. Frank hyggst flytja hingað til lands næsta sumar en hann hefur heillast af fólkinu, landslaginu og meira að segja veðrinu á Íslandi í heimsóknum sínum hingað til lands.

Vill vinna sem ljósmyndari

„Ég hef komið til Íslands svona fimmtán sinnum,“ segir Frank, sem býr um þessar mundir í Sviss og vinnur í banka. „Ég elska náttúruna, hún er svo afskekkt. Ég kann líka betur við fólkið á Íslandi heldur en hér í Sviss. Hugarfarið okkar er svipað.“

Frank er mikill áhugamaður um útivist og ferðalög. Hann hefur farið á Everest-fjall og hyggst heimsækja Suðurskautslandið nú í vetur. Hann segir samt að Ísland sé eftirlætislandið hans, en hér á landi hefur hann meðal annars gengið Laugaveginn margoft, klifið Hvannadalshnjúk og þrætt Hornstrandir.

„Mig langar að vinna sem ljósmyndari á Íslandi. Ég er fyrst og fremst í landslagsmyndum en ég gæti líka boðið upp á andlitsmyndir og dýramyndir. Svo get ég verið leiðsögumaður, ég hef oft farið í göngur og þekki margar gönguleiðir mjög vel.“

Leitar íslenskrar konu

Í skilaboðum Franks, sem hann sendi fyrir viku á um fimmtíu vini sína, lýsir hann yfir áhuga á því að finna íbúð í Reykjavík, helst í grennd við Laugardalinn. Hann segist einnig vera í leit að aðlaðandi íslenskri konu með svipuð áhugamál.

„Það verður væntanlega erfiðast,“ viðurkennir hann. „En ég ætla að búa á Íslandi næstu árin og þá þætti mér best að búa með íslenskri konu. Það væri líka gott upp á að læra tungumálið.“

Hann segist þegar vera búinn að fá nokkur svör, en hlakkar til að fara yfir þau þegar nær dregur. Ljósmyndir úr ferðum Franks um Ísland má skoða á síðu hans. Bréf Franks í heild sinni má lesa hér:

Góðan daginn!

Ég heiti Frank frá Þýskalandi, og stefni á að flytja til Íslands í júní 2015! Gætir þú ef til vill hjálpað mér með eftirtalin atriði:

1. Job

I can offer you the following:

a) Hiking guide and Photography Tours (for german and english speaking tourists)

b) Portraits and Animal photography (I own the best Zeiss lenses for this! 85mm 1.4 to come soon!)

c) Calendars on Iceland (it would be nice to sell them in the bookstores)

d) Risk Control for banks and Web-Design (only English), actually I studied mathematics!