Fäth ekki með gegn Sviss

Handboltamaðurinn Steffen Fäth, leikmaður HSG Wetzlar, hefur þurft að draga úr þýska landsliðshópnum vegna ökklameiðsla.

Þetta eru vondar fréttir fyrir Wetzlar og þýska landsliðið, en talið er að Fäth verði frá í sex vikur. Fäth hefur byrjað tímabilið vel, en hann hefur skorað 18 mörk í þremur fyrstu leikjum Wetzlar í þýsku úrvalsdeildinni.

Möguleikum Dags Sigurðssonar, nýs landsliðsþjálfara Þýskalands, í vinstri skyttustöðunni hefur því fækkað umtalsvert, en Finn Lemke frá Lemgo er eina vinstri skyttan sem eftir er í hópnum.

Dagur gæti þó brugðið á það ráð að nota Paul Drux, leikmann Füsche Berlin, eða Tim Kneule frá Göppingen, í þessari stöðu.

Þýskaland leikur tvo vináttulandsleiki gegn Sviss síðar í mánuðinum; í Göppingen 20. september og í Ulm degi síðar. Þetta verða fyrstu leikir Þýskalands undir stjórn Dags.