Dómsmálaráðuneytið undir sitjandi ráðherra

Útlit er fyrir að starfandi ráðherra Sjálfstæðisflokksins muni taka við dómsmálaráðuneytinu þegar það verður flutt frá innanríkisráðherra á næstu dögum. Líklegast þykir að Bjarni Benediktsson eða Illugi Gunnarsson taki við málaflokknum.

Samkvæmt heimildum fréttastofu þykir þessi lausn heppilegust á þessum tímapunkti frekar en að búa til nýtt ráðuneyti. Sú lausn verður þó líklega niðurstaðan þegar fram í sækir. Um ákveðna málamiðlun er að ræða þar sem Framsókn getur illa sætt sig við að vera einungis með fjóra ráðherra, gegn sex ráðherrum Sjálfstæðismanna í tíu manna ríkisstjórn. Þegar og ef ráðherrum verður fjölgað mun hann koma úr röðum Framsóknarmanna.

En það er ekki bara það sem ræður því að þessi leið er farin nú. Mikil vinna fylgir því að búa til nýtt ráðuneyti og ekki hægt að kasta til hendinni í þeim efnum. Sigmundur Davíð hefur lengi talað um að breyting verði á ráðherraskipan á kjörtímabilinu og ráðuneytum fjölgað. Sú vinna mun óhjákvæmlega taka mið af þeirri stöðu sem nú er upp komin.

Hanna Birna Kristjánsdóttir óskaði eftir því í síðustu viku að vera leyst frá störfum ráðherra dómsmála en jafnframt halda áfram sem innanríkisráðherra. Sigmundur Davíð Gunnlaugsson, forsætisráðherra varð við þeirri bón.

Það fyrirkomulag að koma dómsmálaráðuneytinu fyrir annaðhvort hjá Bjarna Benediktssyni, fjármálaráðherra eða Illuga Gunnarssyni, menntamálaráðherra, tímabundið, gefur ríkisstjórninni tíma til að skipuleggja málaflokkinn upp á nýtt.