Ísland í dag í kvöld: Nauðsynlegt að deila minningum með börnunum

Ljónshjarta er nýtt félag sem stofnað var í þeim tilgangi að styðja við bakið á fólki sem hefur misst maka sinn og börnum sem hafa misst foreldri.

Ína Lóa Sigurðardóttir, formaður félagsins, segir lítið rætt um dauðann. „Dauðinn er náttúrulega tabú í samfélaginu. Það er eins og ef við minnumst á hann eða minnumst ekki á hann þá kemur hann ekki, en það er bara ekki þannig," segir hún en frekari upplýsingar um Ljónshjarta má fá á heimasíðu félagsins.

Sjálf hefur Ína reynslu af því að missa maka en maðurinn hennar lést fyrir um tveimur árum síðan og er hún á því að fólk þurfi að vera opið þegar kemur að umræðunni.

Þegar foreldri deyr hefur það mikil áhrif á líf barna. Gísli Kristbjörn Björnsson, stjórnarmaður í Ljónshjarta, missti konuna sína fyrir um þremur árum. Þegar hún lést var hún ófrísk af tvíburadætrum hjónanna og var komin um átta mánuði á leið. Náðist að bjarga litlu stúlkunum en önnur þeirra lést viku eftir að hún kom í heiminn. Gísla finnst mikilvægt að þeir sem eru í kringum börn sem hafa misst foreldri hlusti og taki þátt þegar börnin opna á umræðu um hinn látna, „þá eru þau að deila minningum og við viljum að minnsta kosti reyna að leggja okkar af mörkum til þess að þau geti gert það.“