Liverpool tekur tilboði Bayern í Reina

Breskir miðlar greina frá því í kvöld að Liverpool hafi tekið tveggja milljóna punda tilboði Þýskalandsmeistara Bayern München í spænska markvörðinn PepeReina.

Liverpool vill losna við Reina af launaskrá, en hann var í láni hjá Napoli á Ítalíu á síðustu leiktíð. Talið er að gengið verði frá félagaskiptunum í þessari viku.

Reina, sem er 31 árs gamall, verður að sætta sig við mikla bekkjarsetu í Bæjaralandi, en þar er þýski landsliðsmarkvörðurinn Manuel Neuer fastur byrjunarliðsmaður.

Reina kom til Liverpool árið 2005 og spilaði 285 leiki fyrir félagið áður en hann missti stöðu sína til belgíska markvarðarins Simons Mignolets í fyrra.