Fimmti handhafi Gullskósins til Barcelona

Luis Suárez, nýjasti liðsmaður Barcelona, er fimmti nú- eða fyrrverandi handhafi Gullskósins - sem veittur er markahæsta leikmanni í Evrópu - sem gengur til liðs við katalónska stórveldið.

Sá fyrsti var Austurríkismaðurinn Hans Krankl, en hann fór til Barcelona árið 1978 eftir að hafa skorað 41 mark fyrir Rapid Wien tímabilið á undan. Krankl var þrjú ár í herbúðum Barcelona, en hann var markahæstur í La Liga með 29 mörk í 30 leikjum á sínu fyrsta tímabili með félaginu.

Tólf árum seinna samdi Barcelona við Búlgarann Hristo Stoichkov, en hann hafði skorað 38 mörk í 30 leikjum fyrir CSKA Sofia tímabilið 1989-90. Stoichkov var hluti af hinu svokallaða Draumaliði Johans Cruyff sem varð m.a. Evrópumeistari vorið 1992.

Árið 2004 kom Svíinn Henrik Larsson til Barcelona á frjálsri sölu frá Glasgow Celtic, en hann fékk Gullskóinn árið 2001 fyrir mörkin 35 sem hann skoraði fyrir skoska stórliðið tímabilið 2000-01. Larsson varð spænskur meistari í tvígang og einu sinni Evrópumeistari á þeim tveimur árum sem hann var í herbúðum Barcelona.

Thierry Henry gekk svo liðs við Barcelona frá Arsenal sumarið 2007, en hann var handhafi Gullskósins árin 2004 (30 mörk) og 2005 (25 mörk). Frakkinn var þrjú ár hjá Barcelona, þar sem hann vann spænska meistaratitilinn tvisvar og Meistaradeild Evrópu einu sinni.

Og nú, sumarið 2014, gengur Úrúgvæinn Luis Suárez, til liðs lið Barcelona, en hann er núverandi handhafi Gullskósins ásamt Cristiano Ronaldo, en þeir skoruðu báðir 31 mark fyrir lið sín - Liverpool og Real Madrid - á síðasta tímabili.