LeBron fundar með Pat Riley

Baráttan um þjónustu LeBron James er í fullum gangi og verður það líklega næstu vikurnar. Þó svo honum sé frjálst að fara frá Miami Heat er ekki víst að hann geri það.

James og umboðsmaður hans, Rich Paul, munu fara á fund með Pat Riley, forseta Heat, í þessari viku. Óvíst er hvar fundurinn mun fara fram.

Körfuboltastjarnan hefur verið í fríi með fjölskyldu sinni síðustu daga og verður síðan með körfuboltabúðir í Las Vegas í vikunni.

Umboðsmaður hans er sagður hafa þegar fundað með fimm félögum - Cleveland, LA Lakers, Dallas, Houston og Phoenix.

Miami ætlar að berjast fyrir því að halda sínum besta manni og verður áhugavert að heyra hvað kemur út úr þessum fundi.