Valin besta forsíðufyrirsætan í Búlgaríu

“Það er alltaf gaman að fá viðurkenningar fyrir vel unnin störf. Ég legg mikinn metnað í mína vinnu svo það er mjög ánægjulegt að fá svona viðurkenningu þar sem forsíðurnar sem ég hef prýtt eru orðnar hátt í fimmtíu talsins,” segir glamúrfyrirsætan Ásdís Rán Gunnarsdóttir. 

Hún hlaut verðlaun sem besta forsíðufyrirsætan á Red Carpet Fashion-verðlaunahátíðinni í Sofiu, höfuðstað Búlgaríu. Tökulið Stöðvar 2 fylgdi Ásdísi eftir í borginni.

“Ég fór til Búlgaríu til að taka upp þáttinn minn og sýna aðeins frá borginni minni Sofiu. Það gekk allt mjög vel. Ég kem til með að sýna frá þessu í Heimi ísdrottningarinnar og hvet fólk til að fylgjast með næsta þætti á þriðjudagskvöld,” segir Ásdís sem lofar góðum þætti.

“Þetta verður mjög spennandi þáttur þar sem mér verður fylgt til London í myndatöku með áhugaverðu fólki.”