Næturgæsla í Húsdýragarðinum aukin

Hávaði, skvaldur og fólk í misgóðu ástandi er einn fylgifiskur tónlistar- og útihátíða og verður tónlistarhátíðin Secret Solstice líklega ekki undanskilin því.

Fimm svið verða sett upp víðs vegar um Laugardalinn allan og hefur  forstöðumaður Fjölskyldu- og húsdýragarðsins töluverðar áhyggjur af því að hávaði og ágangur tónlistargesta hátíðarinnar muni hafa áhrif á dýrin í garðinum. Næturgæsla verður af þeim sökum aukin þá daga sem hátíðin stendur yfir og inngangur að garðinum færður. Hann segir að til mikillar lukku séu dýrin komin yfir þeirra viðkvæmasta tímabil en líkur eru á að dýrin stressist upp.

„Ef gestirnir halda sig utan girðingar þá geri ég ráð að allt fari vel. En það er nú bara þannig, líkt og við höfum kynnst, að þegar farið er að líða á nóttu þá fara sumir að tala dýramál og vilja sinna þeirri þörf,“ segir Tómas Ó Guðjónsson, forstöðumaður Fjölskyldu- og húsdýragarðisins.

„Ég vona bara að gestirnir kunni sig og gerir reyndar alveg ráð fyrir því. Skipuleggjendur hátíðarinnar eru augljóslega atvinnumenn og vita hvað þeir eru að gera.“

Tónlistarhátíðin Secret Solstice er ein sú stærsta sem haldin hefur verið á Íslandi og búist er við að um 9.000 manns sæki hátíðina. Hátíðin verður haldin dagana 20.-22. júní og munu fjölmargar hljómsveitir stíga á stokk og skemmta viðstöddum.

Breskir skipuleggjendur sem sérhæfa sig í uppsetningu útihátíða koma að uppsetningu hátíðarinnar og koma til með að breyta Laugardalnum í goðaheim, en tvö risasvið verða sett upp auk þriggja minni, sem öll munu bera nöfn úr goðafræðunum.