Íslenskt frumkvöðlafyrirtæki hannar staðsetningabundið app

Íslenska frumkvöðlafyrirtækið Locatify hefur hannað app sem framkvæmir sjálfvirka leiðsögn á sýningunni um eldgosið í Heimaey sem opnaði í Eldheimum um síðustu helgi.

Appið nemur merki frá litlum sendum (Bluetooth Low Energy) sem staðsettir eru víðsvegar í sýningarrýminu og útfrá þessum merkjasendingum er staðsetning gesta í rýminu ákvörðuð. 

Á Eldheimasafninu eru á annað hundrað símar, sem gestum er úthlutað ásamt heyrnartólum, og hver gestur hlustar á leiðsögn sem tilheyrir því svæði sem hann er staðsettur í hverju sinni.

Locatify hefur sérhæft sig í slíkum staðsetningabundnum öppum, og hefur hannað vefkerfi þar sem notendur geta sjálfir hannað gagnvirkar GPS útileiðsagnir og ratleiki. Síðan geta þeir gefið út sitt efni í eigin sérmerktum öppum eða öppum Locatify. 

Sýningin í Eldheimum er fyrsta innanhúsleiðsögnin sem byggir á þessari tækni frá fyrirtækinu. Í júní verður einnig hægt að hlaða appinu niður í snjallsíma þeirra gesta sem óska eftir því.