Steinþór: „Við vonumst til að endurfjármagna bankann“

Steinþór Pálsson, bankastjóri Landsbankans, segir að bankinn vonist til að komast inn á erlenda skuldabréfamarkaði á ásætttanlegum kjörum áður en þungur afborgunarferill á 226 milljarða króna skuldabréfum við slitabú gamla Landsbankans hefst. 

Ræður Landsbankinn yfirleitt við afborganir af þessum skuldabréfum í erlendri mynt? Heiðar Guðjónsson hagfræðingur telur svo ekki vera og telur blasa við að færa þurfi niður höfuðstól bréfanna, en endursamið var um skuldabréfin nýlega þar sem afborgunum var jafnað á fleiri ár og síðasti gjalddagi færður frá árinu 2018 til ársins 2026. Samkomulagið er háð því að slitabú gamla Landsbankans, LBI, fái undanþágu frá gjaldeyrishöftum til að greiða upp í forgangskröfur en ógreiddar eru kröfur vegna Icesave upp á jafnvirði 610 milljarða króna. Þá hefur LBI einnig óskað eftir undanþágu til að greiða aðrar kröfur en búist er við að 208 milljarðar króna fáist upp í almennar kröfur þegar búið er að greiða forgangskröfur. 

Við ræddum við Steinþór Pálsson eftir að uppgjör Landsbankans var kynnt í morgun, en bankinn skilaði 4,3 milljarða króna hagnaði á fyrsta ársfjórðungi þessa árs. Sjá má viðtal við Steinþór í meðfylgjandi myndskeiði þar sem hann svarar spurningum um skuldabréfin gagnvart LBI.