Hröð starfsmannavelta hjá Wow air

Mikið hefur verið um uppsagnir hjá lykilstarfsmönnum Wow air að undanförnu.

Í fyrradag lét af störfum framkvæmdastjóri fjármálasviðs fyrir­tækisins, Linda Jóhannsdóttir, en hún hafði starfað hjá Wow air síðan á árinu 2012. Þá hætti Inga Birna Ragnarsdóttir, fyrrverandi framkvæmdastjóri flugfélagsins, í mars síðastliðnum.

Í febrúar hætti þáverandi markaðsstjóri, Ágústa Hrund Steinarsdóttir, og Guðrún Einarsdóttir, fyrrverandi starfsmannastjóri, lét af störfum í desember í fyrra eftir að hafa starfað hjá fyrirtækinu í um átta mánuði.

Þá sagði Guðmundur Arnar Guðmundsson, fyrrverandi forstöðumaður markaðssviðs Wow air, upp störfum í apríl 2013 en hann hóf störf hjá Wow air í janúar 2012.

Fyrir utan framangreinda einstaklinga hafa fleiri látið af ­störfum á þeim rúmu tveimur árum sem flugfélagið hefur verið starfandi og því ljóst að starfsmannavelta félagsins er nokkuð hröð.

Fréttablaðið ræddi við tvo fyrrverandi stjórnendur sem sögðu ljóst að um stjórnendavanda væri eða hefði verið að ræða. Það gæti verið mjög erfitt að vinna í þessu umhverfi og það vekti athygli að lítið sé eftir af upprunalega liðinu.

Svanhvít Friðriksdóttir, upplýsingafulltrúi Wow air, segir meirihluta þeirra sem voru með félaginu við stofnun þess enn við störf.

„Við vorum sjö eða átta til að byrja með í byrjun ársins 2012. Þar af eru fjórir eða meirihlutinn enn þá að vinna hjá fyrirtækinu. Hér er mjög gott andrúmsloft og bjart fram undan hjá Wow air,“ segir Svanhvít.

Skúli Mogensen, forstjóri fyrirtækisins, tekur í sama streng og Svanhvít.

„Við erum orðin 175 starfsmenn núna og veltum tíu milljörðum í fyrra á fyrsta heila starfsárinu okkar. Við gerum miklar kröfur og ætlum okkur enn stærri hluti í framtíðinni. Það er alveg ljóst að það hentar ekki öllum að vinna undir slíku álagi til lengdar og það er líka mjög eðlilegt að skipta um mannskap. Það þarf mismunandi hæfileika til að fara úr núll í tíu milljarða og svo úr tíu í 30 milljarða,“ sagði Skúli í samtali við Fréttablaðið.

Tilkynnt var um ráðningu ­Arnars Más Arnþórssonar, nýs framkvæmdastjóra sölu- og markaðssviðs fyrirtækisins, í gær og Skúli segir stöðu fjármálastjóra verða auglýsta á næstu dögum.