Orðnir óþreyjufullir að ná samningum

Stærstur hluti afborgana þjóðarbúsins í erlendri mynt eru afborganir af skuldum ríkisbankans Landsbankans við þrotabú gamla bankans. Lítið hefur þokast í viðræðum um að endursemja um þessar skuldir.

Landsbankinn sem er að stærstum hluta í ríkiseigu hefur á undanförnum verið að kaupa upp mikið af gjaldeyri á lausu. Ástæðan er sú að bankinn er að safna gjaldeyri til að standa undir afborgunum á 240 milljarða skuldabréfum hjá slitabúi gamla Landsbankans, LBI, sem eru á gjalddaga á árunum 2014 til 2018. Skuldin er tryggð með veði í eignum bankans.

Skuldabréfin voru hluti af uppgjöri milli LBI og Landsbankans vegna þeirra eigna sem teknar voru yfir í nýja bankann í krafti neyðarlaganna eftir í hruninu.

Endurgreiðsluvandi þjóðarbúsins felst í því að viðskiptaafgangur af vöru og þjónustuviðskiptum í erlendum gjaldeyri stendur ekki undir erlendum afborgunum eftir árið 2016.

Stærstur hluti þessa vanda tengist skuldabréfunum hjá Landsbankanum við LBI, eins og Sigríður Benediktsdóttir framkvæmdastjóri hjá Seðlabankanum rakti í þessari frétt.  

Engar viðræður hafnar

Slitastjórn Landsbankans, LBI, er í þessu skrifstofuhúsnæði í Glæsibæ (Sjá myndskeið). Þegar við komum á staðinn þá var talsmaður LBI, ekki við. Þá voru engir fulltrúar slitastjórnar á svæðinu og því var enginn í aðstöðu til að veita fréttastofunni viðtal vegna málsins. 

Fréttastofan hefur nokkrum sinnum óskað eftir viðtali við slitastjórn bankans vegna þessara viðræðna við Landsbankann. Slíkum fyrirspurnum hefur alltaf verið synjað.

Talsverðrar óánægju gætir hjá Landsbankanum um að enn hafi ekki tekist að lengja í þessum skuldabréfum við LBI, þ.e. fresta gjalddögum lengra inn í framtíðina.

Í raun hefur verið hálfgerð pattstaða í málinu um langa hríð. Í fréttaskýringu Harðar Ægissonar í Morgunblaðinu frá 15. mars, sem byggð er á minnisblaði sem kröfuhafar gamla bankans fengu afhent, kom fram að talsvert hafi borið á milli Landsbankans og slitastjórnar um sjálfa viðræðuskilmálana, hvað þá að hefja viðræðurnar sjálfar.

Steinþór Pálsson bankastjóri Landsbankans hefur í viðtölum furðað sig á því að slitastjórn, sem hafi það að markmiði að hraða slitum, hafi ekki viljað hefja formlegar viðræður. Samkvæmt upplýsingum fréttastofu eru starfsmenn Landsbankans orðnir óþreyjufullir að fá niðurstöðu í málið og ná samningum.