Ekki um inn­brot að ræða

Sorphirðumenn reyndu ítrekað að brjóta sér leið inn á heimili knattspyrnukappans Heiðars Helgusonar á höfuðborgarsvæðinu í dag. Eiginkona Heiðars varð vitni að atburðinum.

Samkvæmt heimildum Vísis var tilraunin til innbrots gerð um á milli klukkan eitt og tvö í dag. Mennirnir voru að störfum við sorphirðu fyrir Reykjavíkurborg. Stóðu tveir vörð á gangstéttinni við heimili Heiðars á meðan sá þriðji gerði endurtekið tilraun til innbrots. Sótti hann tól í farþegasæti sorphirðubílsins í þeim tilgangi.

Eiginkona Heiðars varð vitni að atburðinum samkvæmt heimildum Vísis. Sat hún í bifreið sinni og gerði lögreglu viðvart sem brást skjótt við. Þá voru mennirnir á bak og burt. Tilburðir mannanna náðust hins vegar á myndband í öryggiskerfi hússins sem lögregla skoðaði síðdegis.

Upplýsingafulltrúi Reykjavíkurborgar hafði ekki heyrt af málinu. Ekki náðist í lögregluna við vinnslu þessarar fréttar, þrátt fyrir ítrekaðar tilraunir.

Uppfært: Vísir harmar fullyrðingar í fréttinni þess efnis að sorphirðumenn hafi gert tilraun til innbrots. Yfirlýsingu og afsökunarbeiðni frá fréttastjóra Vísis má lesa hér.