„Síðustu dagar hafa verið afar erfiðir“

„Síðustu dagar hafa verið afar erfiðir,“ segir barnsmóðir manns sem tók af sér nektarmyndir sem dreift var meðal unglinga í Grindavík og rötuðu í fjölmiðla.

Barnsmóðirin, Birna Járnbrá Hrólfsdóttir, fékk myndirnar sendar í síðustu viku en þá höfðu þær höfðu verið í dreifingu meðal bæjarbúa í einhvern tíma.  „Nú þegar DV er búið að fjalla um þetta eru sjálfsagt allir á landinu búnir að sjá þessar myndir,“ segir hún í samtali við Vísi.

Birna skrifaði opið bréf sem hún birti í Kvennablaðinu fyrr í dag. Eftir að hún fékk myndirnar sendar ákvað hún að slíta sambandinu við barnsföður sinn. Hann er nú fluttur út og fluttur úr bænum.

Barið á húsið öllum stundum 

Í Grindavík þekkja allir alla að sögn Birnu sem segist hafa orðið fyrir talsverðu áreiti vegna þessa. Börn og unglingar úr grunnskóla bæjarins séu búin að berja á glugga og hurðar heimilis hennar öllum stundum. „Krakkarnir eru meðal annars að koma hérna þegar þau eru í frímínútum,“ segir Birna.

„Ég hef verið að fá skítköst ef svo má segja frá fleirum en börnum,“ segir Birna. „Ég hringdi út á pósthús í fyrradag til þess að kanna eitt mál og fékk þá yfir mig spurningar um af hverju ég væri að athuga með þetta og mér var mætt með dónaskap sem var alveg óþarfi.“  

Birnu grunar að þessi framkoma sé tilkomin vegna myndanna. Eins og sjáist á myndunum sé barnsfaðir hennar einn á þeim og ekkert við myndirnar bendi til þess að hann sé barnaníðingur þó hann sé hugsanlega eitthvað kynferðislega brenglaður.

„Að því leytinu finnst mér umfjöllunin um þetta mál vera ósanngjörn.“

Foreldrar barna í bænum sögðu í samtali við DV í gær að það versta við myndirnar og þetta allt saman væri að maðurinn byggi rétt hjá grunnskóla bæjarins.

„Ég vil að það komi skýrt fram að hann býr ekki hérna lengur. Ég er auðvitað mjög reið við hann en hann er ekki barnaníðingur og á enga sögu um neitt slíkt,“ segir Birna. 

„Barnaníð og kynferðisleg brenglun er alls ekki það sama og mér þykir þetta mjög ljótt að því leytinu til.“



Fjölskyldan stendur við bak Birnu

Sem betur fer hafi eldra barnið hennar sem er á leikskólaaldri ekki fengið að finna fyrir þessu. Fjölskylda Birnu og vinir standa þétt við bakið á henni á þessum erfiðu tímum. Því miður hafi aðrir leyft sér að dæma hana vegna þessara mynda.

„Fólk ætti stundum að líta sér nær áður en það fer að dæma aðra. Fullt af þessu fólki hefur ekkert efni á því að dæma mig. Það lenda allir einhvern tímann í erfiðleikum,“ segir Birna.

Birna vonast eftir því að bréfið sem hún birti veki fólk til umhugsunar en þar segir hún

„Barnsfaðir minn er sjálfstæð persóna og ég er ekki hann. Ég get ekkert í því gert hvaða hegðun hann sýnir en ég get stýrt mínum eigin gjörðum. Máttur internetsins er mjög mikill og hefur oft skæðar og ljótar afleiðinga eins og í mínu tilfelli.

Vöndum okkur við segjum á netinu, í mannlegum samskiptum og líka þegar aðrir heyra ekki til.“

Ég vona kæru Grindvíkingar að þið sjáið aðra hlið á þessu máli eftir mína frásögn og sýnið mér stuðning. Ég þarf fremur á aðstoð ykkar að halda en útskúfun ykkar.“