WOW Air þarf að hætta við Ameríkuflug

WOW Air er að öllu óbreyttu hætt við áætlunarflug til Norður-Ameríku. Forstjóri félagsins er harðorður í garð rekstaraðila Keflavíkurflugvallar sem komi í veg fyrir heilbrigða samkeppni á flugmarkaði.

„Ef við fáum ekki úthlutað brottfaratíma sem við þurfum þá munum við ekki geta hafið flug til Norður-Ameríku á þessu ári,“ segir Skúli Mogensen, forstjóri WOW Air.

Deilan snýst um afgreiðslutíma á Keflavíkurflugvelli líkt og greint var frá í kvöldfréttum Stöðvar 2 seint á síðasta ári. Samkeppniseftirlitið kvað upp úrskurð sinn í nóvember að WOW Air ætti rétt á afgreiðslutímum á Keflavíkurflugvelli til jafns við Icelandair í Norður-Ameríkuflugi milli klukkan 16 og 17 síðdegis.

Lykilatriði að fá þessa afgreiðslutíma

„Samkeppniseftirlitið, eftir að hafa grandskoðað málið, kemst að mjög skýrri niðurstöðu um að það sé lykilatriði að við fáum nákvæmlega þessa tíma til að geta haldið uppi flugi á þessari flugleið,“ segir Skúli.

Isavia, rekstraraðili Keflavíkurflugvallar ákvað að skjóta málinu til áfrýjunarnefndar Samkeppniseftirlitsins sem mun ekki kveða upp sinn dóm fyrr en í næsta mánuði. Það er of seint fyrir WOW Air sem mun að öllu óbreyttu hætta við flug til Boston sem áformað var frá og með sumarbyrjun.

Vernda einokunaraðstöðu Icelandair

„Það er mjög umhugsunarvert að Isavia og stjórnsýslan skuli vera að vernda einokunaraðstöðu Icelandair með þessu móti á kostnað skattgreiðenda,“ segir Skúli ósáttur.

Talsmenn Isavia segja fyrirtækið ekki koma að úthlutun afgreiðslutíma og því hafi málinu verið skotið til áfrýjunarnefndar Samkeppniseftirlitsins. Þeir sérfræðingar í flugmálum sem fréttastofa ræddi við í dag segja að WOW Air gera Isavia að blóraböggli í málinu. Félagið sé hreinlega ekki tilbúið í Norður-Ameríkuflug. Skúli neitar þessu og segir félagið hafa lagt mikla vinnu í að hefja flug til Norður-Ameríku. Hann er svartsýnn á framþróun málsins.

„Ég er ekki vongóður um það að við náum að klára þetta mál fyrir sumarið.“