Mál MS aftur á borð Samkeppniseftirlitsins

Áfrýjunarnefnd samkeppnismála leggur fyrir Samkeppniseftirlitið að rannsaka nánar verðlagningu MS á hrámjólk til tengdra fyrirtækja sinna annars vegar og samkeppnisaðila hins vegar. Í tilkynningu til fjölmiðla segir að MS hafi við meðferð málsins fyrir Samkeppniseftirlitinu látið undir höfuð leggjast að upplýsa um samning við Kaupfélag Skagfirðinga, sem fyrirtækið síðan byggði málflutning sinn á fyrir áfrýjunarnefnd.

Forsaga málsins er sú að forsvarsmenn Mjólkurbúsins Kú kærðu MS og Kaupfélag Skagfirðinga til Samkeppniseftirlitsins fyrr í haust og kvörtuðu undan því að Kú þyrfti að greiða hærra verð fyrir hrámjólk en þeir keppinautar mjólkurbúsins sem tengjast MS. Samkeppniseftirlitið komst að þeirri niðurstöðu í september að MS hefði gerst sekt um brot á samkeppnislögum um misnotkun á markaðsráðandi stöðu.

Fyrir áfrýjunarnefnd lagði MS fram samning við Kaupfélag Skagfirðinga frá árinu 2008 sem aldrei hafði verið vísað til eða greint frá, að því er segir í tilkynningu áfrýjunarnefndar, þrátt fyrir ítrekaðar beiðnir um skýringar og gögn vegna málsins. Því telji nefndin sér skylt að koma málinu aftur til meðferðar Samkeppniseftirlitsins. Þar verður meðal annars kannað hvers vegna gögnin voru ekki lögð fram við upphaflega rannsókn málsins, en viðurlög geta legið við því að halda upplýsingum frá eftirlitinu við rannsókn máls.