Óli Stef og „Facebook-löggan“ í eldlínunni

Ráðstefnan TEDxReykjavík verður haldin þann 17. maí n.k. í Hörpu. Markmið ráðstefnunnar er að ljá góðum hugmyndum vængi. Boðið er upp á fyrirlestra þar sem kynntar verða nýjar hugmyndir og spennandi uppgötvanir.

TEDxReykjavík er kjörinn vettvangur fyrir Íslendinga til að koma hugmyndum sínum á framfæri á alþjóðlegum vettvangi, en erindin eru mörg á ensku. Mælendur á TEDxReykjavík eru einhverjir áhugaverðustu hugsuðir, frumkvöðlar, listamenn og áhrifafólk sem Ísland hefur upp á að bjóða að því er segir í fréttatilkynningu.

Meðal mælenda á TEDxReykjavík 2014 verða Gísli Marteinn Baldursson, sjónvarpsmaður, Gulla Jónsdóttir arkítekt, Ólafur Stefánsson handknattleiksmaður, Þorsteinn Guðmundsson grínisti, Ýmir Vigfússon, doktor í tölvunarfræði, Þórir Ingvarsson betur þekktur sem „Facebook löggan“, Ásdís Olsen kennari og Karl Aspelund, prófessor við háskólann í Rhode Island.

Ólafur Stefánsson mun halda fyrirlestur um það sem hann lærði af handboltanum og hvernig við getum öll notað þær lexíur í daglegu lífi okkar. Hann leggur áherslu á mikilvægi þess að við séum meðvituð um aðstæður okkar og alla þá möguleika sem frammi fyrir okkur standa. Þannig getum við brugðist best við umhverfi okkar hverju sinni, hvort sem um er að ræða íþróttaleik eða einhverjar aðrar aðstæður í lífinu.

Pétur Kr. Guðmundsson, kvikmyndagerðarmaður verður einnig á meðal mælenda. Pétur er 27 ára kvikmyndagerðamaður og frumsýndi nýverið kvikmyndina Heild, þar sem náttúra Íslands er í aðalhlutverki.

Fyrir rúmum þremur árum féll Pétur fram af kletti í Austurríki og lamaðist fyrir neðan mitti. Læknar sögðu honum að hann myndi aldrei stíga í fæturna á ný. Með viljann að vopni hefur honum hins vegar tekist að stíga í fæturna með því að klæðast spelkum og notar hjólastólinn aðeins heima við. Hann er hvergi nærri hættur í bataferlinu og berst fyrir framförum í þágu lamaðra um allan heim og vinnur að þróun nýs stoðtækis með Össuri.

Pétur mun gefa okkur innsýn í hvernig það er að vera sagt að maður muni aldrei geta staðið upp það sem eftir er. Hann mun fjalla um baráttuna fyrir auknum framförum í þágu mænuskaðaðra og um þá staðreynd að hjólastóllinn er enn þann dag í dag eina lausnin sem notuð er við mænuskaða.

Nánari upplýsingar má finna á heimasíðu viðburðarins.