Elvar Már allt í öllu hjá Svartþröstunum í Brooklyn

Njarðvíkingurinn Elvar Már Friðriksson hefur staðið sig vel á stóra sviðinu í New York-borg en hann er nú ásamt Martin Hermannssyni á sínu fyrsta ári í bandaríska háskólaboltanum.

Elvar Már fór fyrir liði LIU Brooklyn Blackbirds í fyrsta sigurleik liðsins í fyrrinótt þegar hann var þá með 19 stig og 7 stoðsendingar. Elvar var meðal annars með 12 stig og 6 stoðsendingar í seinni hálfleiknum sem LIU-liðið vann með 17 stiga mun. LIU Brooklyn skoraði þá 53 stig og Elvar átti með beinum hætti þátt í 30 þeirra (57 prósent).

Þetta var fyrsti leikurinn þar sem Elvar Már er stigahæstur hjá LIU Brooklyn en hann er engu að síður eini leikmaður liðsins sem hefur skorað yfir tíu stig að meðaltali í leik.

Elvar Már er með 10,7 stig að meðaltali en næstir á lista eru reynsluboltarnir Gerrell Martin (9,6 stig í leik) og Landon Atterberry (9,6) sem eru báðir á sínu síðasta ári í skólanum.

Þetta er hins vegar ekki í fyrsta sinn sem Elvar er með flestar stoðsendingar í liðinu en því náði hann þarna í fimmta sinn í þessum fyrstu sjö leikjum tímabilsins.

Elvar hefur nú hækkað stigaskor sitt í fjórum leikjum í röð og verið með tvo eða fleiri þrista í þeim öllum. Hann er með 12,8 stig og 5,8 stoðsendingar að meðaltali í þessum fjórum leikjum sem er mjög flott tölfræði hjá nýliða í bandaríska háskólaboltanum.

Þegar tölfræði LIU Brooklyn er skoðuð frá fyrstu sjö leikjum tímabilsins kemur í ljós að Elvar Már er efstur hjá liðinu í stigum, stoðsendingum, þriggja stiga körfum, vítaskotum teknum og mínútum spiluðum.

Martin byrjaði ekki vel en hefur fundið sig betur í síðustu leikjum liðsins. Martin er fjórði stigahæsti hjá LIU Brooklyn með 8,6 stig í leik og þá er hann í öðru sæti í stoðsendingum. Martin er einnig með tveimur fleiri fráköst en Elvar.

Íslendingarnir tveir hafa gefið samtals 56 af 78 stoðsendingum LIU Brooklyn í fyrstu sjö leikjunum sem þýðir að 72 prósent stoðsendinga liðsins hafa verið íslenskar. Enginn annar en Íslendingarnir tveir hefur leitt liðið í stoðsendingum það sem af er tímabilinu.

Það verður fróðlegt að fylgjast með framhaldinu hjá strákunum sem báðir eru í stórum hlutverkum frá fyrsta leik sem er langt frá því að vera gefið í bandaríska háskólaboltanum.