Til greina gæti komið að endurgreiða málskostnað

Már Guðmundsson seðlabankastjóri segir að til greina komi að endurgreiða málskostnað sinn vegna málaferla við bankann. Hann telur sig ekki hafa brotið af sér.

Lögmannsreikningar Más voru greiddir að fullu af Seðlabankanum eftir að hann fór í mál við bankann vegna lækkunar launa sinna. Bankaráð ákvað í gær að fela Ríkisendurskoðun að gera úttekt á greiðslunum og kanna hvort farið hafi verið að lögum.

Már segir að til greina geti komið að hann endurgreiði málskostnaðinn, þó enn sé of snemmt að segja til um það.

„Það getur verið að niðurstaðan verði sú að ég eigi að gera það, þó ég efist um það,“ segir Már.

„En svo getur vel verið að ég eigi að gera það hvort sem er. Eins og maður þekkir er eitt að segja að ekkert hafi verið gert rangt en enginn vandi að fá almenningsálitið upp á móti þeim sem eru taldir hafa eitthvað hærri tekjur en aðrir.“

Lára V. Júlíusdóttir, fyrrverandi formaður bankaráðs Seðlabankans, tók ákvörðunina um það að endurgreiða Má kostnaðinn vegna málaferla. Í vikunni sagði hún fréttastofu málið vera „storm í vatnsglasi“ og að bankaráð geti ómögulega krafið Má um endurgreiðslu málskostnaðar.

Már sat fyrsta hluta bankaráðsfundarins í gær og lagði þar fram bréf til ráðsins þar sem hann óskar eftir því að þeim þætti athugunar sem snýr að honum sjálfum verði flýtt.

„Við þurfum að fá niðurstöðu í það hvað var rétt og rangt í málinu,“ segir Már. Hann segir jafnframt að ekki sé gott fyrir einn né neinn að láta óvissu í málinu hanga yfir.

„Ég tel mig ekki hafa gert neitt rangt í þessu ferli en auðvitað kann öðrum að sýnast annað,“ segir Már.

Ásamt bréfinu lagði Már fram upplýsingar og gögn frá Seðlabankanum til bankaráðs varðandi málið.

„Síðan er gert ráð fyrir því að það verði fundur á næstunni þar sem mér mun gefast tækifæri til að útskýra mjög ítarlega mína hlið á málinu,“ segir Már.