Kostnaður við rannsóknina á falli Sparisjóðanna kominn í rúman hálfan milljarð

Skýrsla rannsóknarnefndar Alþingis um aðdraganda og orsakir falls Sparisjóðanna verður kynnt í næsta mánuði, rétt um 20 mánuðum seinna en áætlað var. Verkefnið mun viðameira en talið var í fyrstu, segir forseti Alþingis.

Rannsóknarnefnd Alþingis vegna falls Sparisjóðanna var skipuð 19. ágúst 2011. Hún átti að skila af sér skýrslu níu mánuðum seinna. Nú, rúmum tveimur árum síðar og rétt um 560 milljónum króna í kostnað, sér loks fyrir endann á verkefninu.

„Já, við erum að vona að það sé þannig. Það er stefnt að því að það verði hægt að gefa út skýrsluna í næsta mánuði, nákvæmlega hvenær treysti ég mér ekki til að segja,“ segir Einar K. Guðfinnsson, forseti Alþingis.

Einar segir að margar ástæður séu fyrir því að skil á skýrslunni hafi dregist svona úr hófi fram. Snemma hafi komið í ljós að verkið hafi verið mun viðameira en ætlað var í fyrstu, umfang Sparisjóðanna hafi verið mun meira en talið var.

Þá var þingsályktunartillagan mjög almennt orðuð en þar segir að nefndinni sé ætlað að leita... sannleikans um aðdraganda og orsök rekstrarerfiðleika og gjaldþrots sparisjóðanna á Íslandi.  Nefndinni er auk þess falið að rannsaka hvort vanræksla eða mistök hafi valdið fallinu og hverjir beri ábyrgð. Hvernig það skuli gert er síðan lauslega útlistað í sex liðum.

„Voru mistök að orða þingsályktunina eins og gert var?“

„Ég held að hún hafi verið alltof opin, hún var ekki nægilega markviss og hún var ekki nógu skýr.“

Einar segir að kostnaður við rannsóknina sé komin í um 560 milljónir króna.

„Það er gríðarlega mikil upphæð og gefur auðvitað fullt tilefni til að skoða hvernig við getum staðið betur að þessu. Ég held hinsvegar að það sé ekki við nefndirnar að sakast í þessum efnum heldur miklu frekar að verkefnið er bara stærra en menn ætluðu í upphafi.“

Einar vill ekki ræða innihald skýrslunnar en segir þó að umfang hennar verði mikið.

„Hún verður gríðarlega stór í mörgum bindum.“