Magnaður sigur í Maribor

Íslenska landsliðið í handknattleik vann magnaðan sigur, 28-29, á Slóvenum í Maribor í kvöld. Íslenska liðið átti magnaða endurkomu í síðari hálfleik og vann frækinn sigur.

Strákarnir mættu ekki nógu vel stemmdir til leiks og voru að elta allan fyrri hálfleikinn. Sóknarleikurinn alls ekki nógu beittur og hvorki Aron né Alexander náðu að skora í fyrri hálfleik.

Markverðirnir okkar vörðu þess utan aðeins fjóra bolta á meðan Skof varði 15 bolta í slóvenska markinu. Hann var með 65 prósent markvörslu í fyrri hálfleik sem er mögnuð frammistaða.

Þrátt fyrir þessar staðreyndir var munurinn aðeins fjögur mörk, 13-9, í hálfleik og Ísland enn inn í leiknum.

Strákarnir komu til baka í seinni hálfleik. Alexander komst í gang sem og Aron í markinu. Jafnt var á með liðunum á lokamínútunum en Ísland komst yfir í fyrsta skipti er ein og hálf mínúta var eftir.

Guðjón Valur skoraði sigurmark leiksins 30 sekúndum fyrir leikslok. Slóvenar töpuðu boltanum í lokasókninni og íslensku strákarnir fögnuðu.

Fyrirliðinn Guðjón Valur bestur í dag og tók oft af skarið ásamt því að klára sín skot vel. Alexander frábær í seinni hálfleik og Snorri átti fína spretti. Ólafur Bjarki átti fína innkomu í seinni hálfleik.

Íslenska liðið er komið með þriggja stiga forskot í riðlinum og stefnir hraðbyri á EM í Danmörku.